教育部臺灣閩南語漢字輸入法2.0版
「教育部」臺灣閩南語漢字輸入法（2.0版）出來久久囉，前攏無舉薦互朋友來試用，當（taⁿ）過時賣曆日（la̍h-ji̍t），佫來補介紹一下。 【軟體網址】 軟體網址是http://140.111.56.95/hanji/MOE_TBHS_2.0.exe，卜掠，骹手愛緊哦！ 【軟體功能介紹】 本輸入法，佮「Ext-B字集」配搭。汝電腦若無安「Ext-B字集」來講啊，系統程式會引chhōa汝先安chit-ê。「Ext-B字集」檔案有較大，安了伊會叫汝重起動。相比起來，主程式檔案加真細。 Chit-ê輸入法有幾若號的款式，簡單介紹一下： 1.主程式檔案kan-ta有657KB，檔案無通大，古錐古錐，束潔束潔，在線卜掠檔案真利便，卜安嘛真緊。 2.常用詞會使免拍聲調，只卜拍聲母、韻母，佫加拍空格鍵（Space bar）著會使得。 3.有簡單佫好用的介面，由在儂改字庫佮詞庫。 4.大半的方音差攏包包在內，無夠用的，佫會使家己添入去。 5.候選字選單上尾有合（kah）羅馬字。卜拍羅馬字（台羅），會使ji̍h↑鍵，直透跳去揀羅馬字。 6.拼音若是拼毋著，系統會pûn-pi-á「啲」一聲，拍算是咧警示，拼音字嘛隨反紅。 【軟體詳細使用說明書】 卜看較詳細的使用說明書，通ji̍h下骹的鏈結，kā說明書檔案掠轉去斟酌看： http://140.111.56.95/hanji/suatbing.pdf
QQ，閩南語嘛會通
QQ是中國儂上合意的在線即時通訊軟體，佇中國上kài濟儂用。我所熟似的，所拄著的少年儂，無一个無用QQ的。有的儂，一个儂著有幾落个Q號。上線QQ，練仙khà-kho̍k、聯繫業務、辦公通訊、朋友問安……會使講是無所不能，無所不用。平平是即時通訊軟體，國產的QQ，比起msn、雅虎通(Yahoo! Messenger) chiah-ê番仔貨，實在加足旺的。QQ雖然講是佔大面，功效也bōe少，不而過，從到taⁿ為止，猶原無支持Uniocde編碼，上加（siōng-ke）會當看著GBK的漢字，iah若是GBK以上的Unicode漢字，伊著無法度正常顯示囉。漢字是安呢，白話字著較濟免講，佇QQ頂面拍有調號的羅馬字，毋是無法度顯示，無著是走choa̍h去。即方面，QQ實在真兩光，嘛互儂真失望。這是啥物原因咧？真簡單，從到taⁿ，毋管是msn、雅虎通、QQ，或者其它別種即時通訊軟體，總是，佇中國in攏是為普通話服務的，並且獨獨為普通話niā。所以，對普通的QQ用戶來講，普通話捷用（chia̍p-iōng）的兩三千个漢字，佫加一寡普通的符號，著真有夠用ah，完全用bōe著GBK以上的Unicode漢字佮符號。逐个攏chiâu知，閩南語用著的漢字佮白話 字，chhoàn-chhoàn攏是GBK以上的Unicode漢字佮符號，所以，若是硬硬卜滯咧QQ頂頭寫閩南文，無小可（sió-khóa）改造一下，決定是無變步啦。 Sòa落來，咱著簡單來介紹一下，卜按怎對QQ進行改造，chiah會當互伊有法度拍閩南文。猶原是hit句古早話——江湖一點訣，講破毋值錢，請斟酌聽我講sòa落去。
用ToCyrillic Firefox來拍閩南白話字（Amoy-POJ）
有真濟儂，會捌閩南白話字（Amoy-POJ），會曉看，會曉寫，不而過，in手頭soah無半項會當“輸入/輸出白話字”的家俬頭仔。進前，逐个知影有一款名號做“keymanPOJ輸入法”會當拍白話字，用著是hàm-hàm利便。即陣，有一項物件，比“keyman”佫較利便，拍字佫較簡單、佫較緊，只卜咱會曉寫白話字，著會曉拍字，有影 俗佫有kio̍k。即款物件，號做Transliterator（舊底叫做“ToCyrillic”），是Firefox（火狐瀏覽器）的一項附加元件，現子時的版本是Transliterator 0.7.0.1。 【Transliterator官方網站】 Transliterator 0.7.0.1是Firefox瀏覽器的附加元件，想卜詳細瞭解的儂，會當去軟體開發者的官方網站參觀一下。阮乾凋佇遮提供一條鏈仔，有興趣的儂，做恁 過去 看看bāi-bāi 咧。 【Transliterator拍字的原理】 Transliterator 0.7.0.1有真濟項功能（土話講真濟路用），從中，上主要的原理是翻譯。即款物件會當拍閩南白話字，著是運用將“輸入符號”翻譯做“輸出符號”即條基本原理。比論講，輸入符號“E7-mng5”，輸出符號自動變做“Ē-mn̂g”。橫直，系統工作的原理，著是將“輸入”→“輸出”的過程，當做是“翻譯”的過程。 簡單瞭解Transliterator的工作原理了後，咱著詳細來講解“按怎佇電腦內底安Transliterator”佮“按怎用Transliterator在線拍字”即兩項議題。
google拼音输入法
伫即个所在看着一篇文字，心适心适，顺sòa偷挽转来，小可chhiâu-chhiâu lia̍p-lia̍p咧，互伊“在地化”一下—— Khiám-chhái有bōe少侬知影ah，前几日仔，“Google中国”发布“谷歌拼音输入法”的头一个版本。笔者即时下载试用，心得如下。 笔者进前oân-á用过濟濟种拼音输入法，按“微软全拼”、“智能ABC”、“微软拼音”、“紫光拼音”、“智能狂拼”、到kah“拼音加加”、“搜狗拼音”等等……會用講是“無所不试”，逐項用kah thàng，甜鹹chiáⁿ無嫌啦！即陣新出的“谷歌拼音输入法”真正不哩仔讚， liâm-tong-sî soah去sahⁿ著。Nā這，功能是無kài出擢（chhut-tioh）啦，不而過，技術尤其是詞庫做了真正bōe嫌得！ “規句輸入”即條做了有影讚，繼承著“微软拼音”上大的優點，iah“动态词频”佮“网路词库”算講是種著（chéng-tio̍h）“搜狗拼音输入法”的優良基因。 网路词库是一个真正讚的功能，有這了後，著毋免規日扎著備份词库四界kho̍k-kho̍k tsông囉。會記咧筆者嘛捌幾落擺kā“搜狗拼音输入法”开发小组提意见，苦勸in開發网路词库的功能，soah攏chêng來毋捌得著回應。即mái Google總算替咱完成即个願望。 是講，萬物本成無十全（tsa̍p-tsn̂g），Google拼音oân-á未免得。伊的欠點，第一著是面板看著小可“白chiáⁿ無味”，尤其是浮動條安呢一條長-lò-sò，不而過這嘛是Google一貫的個性，素素，毋佫踏實。佫來，伊嘛無支持句子佮標點符號濫摻佇咧用，即點希望改善一下！ 筆者進前長期teh用“搜狗拼音”，即mái有“谷歌拼音”了後，隨kā“搜狗”刣捒。咱卜來感謝“搜狗拼音”互咱chiah-ê好空的。毋管是輸入法抑是啥物貨，市場愈競爭，結尾得利的猶原是老百姓。 咱佇chia毋是咧替儂拍拳賣糊藥，到底好抑歹，汝講的chiah准算！ PS： 新闻：谷歌拼音输入法火热发布 下载：谷歌拼音输入法 官方网页
MSKLC輸入法生成器 使用體會
頂幾工仔，用“Microsoft Keyboard Layout Creator (MSKLC／微軟鍵盤輸入法生成工具)”來咧編寫POJ佮國際音標輸入法的時，chiah發現著一个問題。講“發現”，不如講是“到taⁿ chiah知影”。 “MSKLC”應該算是bōe歹用的輸入法生成工具，操作簡單，准講是像我即款完全毋捌英文的儂（我是正港“鸚哥二四"的青盲牛!!），嘛共款chhit -thô kah有來有去。我定咧講，萬物(mi̍h)有一好著無兩好；有時仔，明明是優點，不而過，若用佇無共的時陣，抑是無共的所在，優點嘛會變成欠點。 MSKLC正正著是安呢。
MSKLC POJ 0.3輸入法
【功能】 漳泉語（廈門音）白話字（ＰＯＪ）輸入法。ＰＯＪ編碼采用國際標準——萬國碼（统一码／Unicode）。 【使用環境】 1、中文版Windows XP ，支持Firefox（瀏覽器）；Word、Excel、寫字板等等有支援Unicode 的軟體。2、！！注意：（1）一定愛先安「Taigi Unicode」即套字型（若無，會出亂碼）；（2）網頁瀏覽器，請用Firefox 。 【安裝】 1. Download「MSKLC POJ0.3」檔案(.rar)。2. 先tháu縛（解壓縮），了後安裝。3. 安好了後，拍開「輸入法設置」，選擇「添加(D)」，佇「鍵盤布局/輸入法(K)」即欄，選擇「MSKLCPOJ0.3」，chhi̍h「確定」。4. 電腦重佫啟動。【鍵盤佈置】 ［圖１］； ［圖２］ 【拍字的步數】 1、先認明「聲調符」，「'」、「`」、「^」、「=」、「|」、「v」分別代表示：第二聲、第三聲、第五聲、第七聲（包括泉州腔第6聲）、第八聲、第九聲（高升調）。2、拍字的時，先chhi̍h「聲調符」，佫來chhi̍h母音。譬如講：（1）”hô-pêng”（和平），拍字的順序是：h^o p^eng ;（2）“Ē-mn̂g” （廈門），拍字的順序是：=E m^ng。3、詳細拍字的步數（請對照［圖１］、［圖２］的鍵盤佈局。）（1）chhi̍h ' 佮 a ，出 á ，簡單表示：「 ' 」 +「a 」→ 「á」；「 ' 」 +「e 」→ 「é」 「 ' 」 +「 i 」→ 「 í 」 「 ' 」 +「 m 」→ [...]
MSKLC POJ 輸入法
我用Microsoft Keyboard Layout Creator (微軟鍵盤輸入法生成工具，縮寫“MSKLC”)做的“閩南語白話字(POJ)輸入法”。有兩套，“MSKLC POJ0.1”只會當輸入POJ，“MSKLC POJ0.2”是佇0.1的基礎上加一寡輸入國際音標(IPA)的功能。 功能：1. MSKLC POJ0.1版本有法度輸入閩南語白話字(POJ)；2. MSKLC POJ0.2版本會當輸入閩南語白話字(POJ)、國際音標(限制佇廈漳泉語音系統范圍內)；3. 攏采用Unicode編碼，無法度輸入客語羅馬字。 使用環境：中文版Windows XP （SP2 佫較好），支持Internet Explorer 6、Firefox；Word 2003、Excel 2003、寫字板等等有支援Unicode 的軟體。 安裝： 1. Download“MSKLC POJ0.1“或者“MSKLC POJ0.2(推薦)”檔案(14kb)，解壓縮(.rar)了後直接執行安裝。檔案誠細(14kb)，毋免3秒鍾著會當安裝好勢。2. 安好勢了後，拍開”輸入法設置”，選擇”添加(D)”，了後佇“鍵盤布局/輸入法(K)”即欄，選擇MSKLCPOJ0.2(設使是beh鬥0.2版)，chhi̍h“確定”。3. 佇語言欄，會當看著“MSKLCPOJ0.2″(無圖標)，若是暫時無看著，請重開機。(注意：雖然無圖標，毋佫看有名稱“MSKLCPOJ”，使用無問題) 使用： 1. 輸入POJ的方法：(1). 先拍子音(聲母)，佫來拍母音，佫來拍聲調。比論講，”hô-pêng”(和平)，拍字的順序是：ho^ – pe^ng 。(2). 新的”葫蘆點”(U+0358)，chhi̍h ” / ” (佮”?”共位)；舊的”葫蘆點”(U+00B7)，chhi̍h ” * ” (shift → ；(3). 鼻化韻” ⁿ “，chhi̍h ” q → n ” [...]
吹銷幾个閩南語的輸入法
設使汝常在(chhêng-chāi)有咧寫閩南文，汝定著需要一套好用的“漢字輸入法”，佮一套好用的“POJ”輸入法（假使汝有咧寫POJ）。這是上起碼的傢俬，若汝無即套傢俬，我實在想無汝卜用啥來做工課(khang-khòe)。 閒閒無代誌，我想卜共逐家報告一寡仔普通時仔較有咧用的“閩南語輸入法”，若是叨位講毋著去，請知影的儂來指教。 一、【漢字輸入法】 漢字輸入法，我揀“方旻五筆”。 “方旻”有足濟版本，攏差無濟，透底支持“GBK漢字擴大字元集”。只卜汝會曉普通的五筆輸入法，汝著會曉用“方旻五筆”。簡單講啦，汝若是用普通的五筆輸入法（比論講“Microsoft Windows”系統有合(kah)的“王碼五筆86版”），安呢，我共汝講，真不幸，汝干凋有法度拍（輸出）一寡仔較簡單的漢字，對著遐个略仔較複雜的字，抑是繁體字，汝根本無法度拍出來，“看有食無kan-ta-giàn，親像佛祖咧蒸油煙”，即款“艱苦兼氣努(khì-ló•)”的滋味，相信汝穩當有真深的體會。親像“王碼五筆86版”、“智慧拼音ABC輸入法”、“微軟拼音輸入法”……即款“兩光兼無路用”的輸入法，正正著是互汝鬱chut的兇手。 現子時，線頂有足濟真讚真好用的漢字輸入法，實在“俗佫大碗”。“方旻五筆”是其中的一種，尤其適合中國儂的氣口。凖講汝到taⁿ 猶未chhē著合意的輸入法，若安呢，我家婆介紹汝來用“方旻五筆”。頭前有講過也，“方旻五筆”的用法（拍字的撇步）佮普通的“五筆輸入法”（比論講“王碼五筆86版”）差不多共款，增差in 的功能無sio-siâng。干凋即點來講，著會當看做是“天佮地”的差別。“方旻”支持GBK，毋若(m̄-nā)會當真簡單來拍出所有的簡體漢字（簡化字）佮繁體漢字（正體字），上重要的，伊佫會當輕鬆拍出一寡複雜，罕得看著、罕得用著的“古早字”（普通話叫做“生僻字”），這著是 “方旻”互我憶著(it–tio̍h)的所在。汝用別款的輸入法，hoān勢無法度拍出“俍、肏、墘、憖、即、勿會、墘、覕、嘅、険……”即款互汝感覺誠龜怪(ku-kòai)的字，不而過，我共汝報告，若用“方旻五筆”，是真輕鬆著攏拍出來矣。安怎？啥款？有想卜試看māi 無？ 二、【白話字(POJ)輸入法】 “白話字”（POJ）的輸入法，定著會少。 1. keyman poj_v0.6 現子時，上kài交易(ka-ia̍h)的是一套名號做“keyman poj_v0.6”的東東（最新版本“keyman poj_v1.00”嘛已經上線，詳細請看第2條。“Keyman poj_v0.6”有支持“Unicode”（著是“萬國碼” / “統一碼”啦！），實在tah心佫好用！我是用kah真慣勢啦，憑良心講，感覺bē歹用。若有興趣的朋友，會當去lia̍h來試看māi ，佇遮(開放互儂download，並且教儂安怎使用）。 2. keyman poj_v1.00 最近“keyman poj”輸入法的發明儂陳柏中先生，佇伊個人的BLOG公布最新版本Keyman POJ_1.00（試用版，正式版本），現子時當咧提供互儂试用。有按算卜去试用的朋友，愛會記得先安装舊版的keyman poj_v0.6。Keyman POJ_1.00比起Keyman POJ_0.6”：加设计“第九聲”（请参考“第3條”）、安装的時，會自動鬥Doulos SIL佮Taigi Unicode即两套Unicode标凖字型。站長我鬥吹銷一下！！卜安的朋友，會得去陳先生的網誌看使用说明，嘛會當佇遐lia̍h檔案。 3. Taiwanese Package2.0 除了頂面所講的“keyman poj_v0.6”，猶佫有另外一套，oân仔有支援“Unicode”編碼，嘛是bē歹用，著是“Taiwanese Package2.0”(簡稱“TP2.0”，毋是TP1.5哦！)。 “TP2.0”毋但仔會當拍閩南白話字，佫會當拍客語(Hakka)羅馬字佮臺灣原住民語羅馬字！就閩南白話字來講，“TP2.0”比“keyman poj_v0.6”加設計一个“第9聲”的聲調——用“ ˇ ”即个聲調符來表示(比論講：ă , ĕ , ŏ, ŏ• , ĭ , ŭ , n̆g, [...]
“输入法”敢会当安呢设计
Hiān-chú-sî, koan-hē “Bân-lâm-gú” ê su-ji̍p-hoat, sǹg-sǹg–leh mā í-keng ū kúi-nā thò ah, khòaⁿ–khì-lâi kán-ná 1-thò pí 1-thò khah chìn-pō· (góa ê kám-kak lah, m̄-chai to̍h-m̄-to̍h ? ). Ū-ê sī choan-tê teh phah Pe̍h-oē-jī (POJ), ū-ê sī Hán-Lô lām-chham. Si̍t-chāi kóng, che sī Bân-lâm-gú ê hok-khì, lán beh koh chi̍t-pái hiòng sò·-ū ê siat-kè-jîn kah chhut-la̍t [...]
-
寶惜環境 寶惜地球 咱做夥來…
在線閩南語字辭典現查
版權
：歡迎加入《有緣來做夥》QQ陣（陣號：81229762）
