外洋漁工的故事（1～10）
編譯：limkianhui 頭序 本文是照作者真實的經歷來寫的紀實小說（siáu-soat），是一个關係海上血汗工場的故事。為著保全個人私奇（su-khia/sai-khia），船員有用假名，ah若故事內中所講的——hiah-ê船頂的代誌，攏總是正實（chiaⁿ-si̍t）的；船務代理公司佮漁業公司有的嘛用假名。 本文徛算「內在較贏過文字」，kan-kan-á愛卜看「YY型小說」的儂，拍算勿愛看較勿會gīn。 …… 2010年3月31號暗。佇大大間的冷藏倉（léng-chông-chhng）ni̍h，林達拚kah大氣喘勿會離。一四界攏chiâu凍櫃鎮滇滇（tīⁿ-tīⁿ），空氣勿會啥tháu，儂咧行的巷路狹覕覕（e̍h-bih-bih），拄好兩个儂thèng好相閃身niā，所在的確真熻（hip）真偓促（ak-chak）。林達雖然一直透舞無停，拚kah滿身重汗，ah毋過，骹底soah猶原凍吱吱。著按呢，汗ná流，ná咧搬魷魚仔凍，大大件，一件soà一件。溫度下（kē）到tih-beh倚零度啊，驚了小可歇停（hioh-thêng）一下，khiám-chhái著愛凍死滯即个毋是儂滯的所在。當（taⁿ）已經相連soà操卜二十六點鐘啊，邊仔hiah-ê漁工，敢（káⁿ）是操傷久，儂咧悿（thiám），接載勿會牢（tiâu）啊，攏瘟滯凍櫃仔邊咧tuh龜。林達毋敢，伊驚了一下歇，身軀若冷落來，汗水食入腹，khiám-chhái會染著風寒，破病感冒。
烏鴉佮狐狸【為著一塊肉】
【為著一塊肉】（漢羅版） 〈ŪI-TIO̍H CHI̍T TÈ BAH〉（白話字） 樹林內，彼隻烏鴉，生成古意古意，戇直戇直。熟似伊的儂，無幾个講伊好的，的確是少儂呵咾，濟儂嫌。有的講伊忠厚；有的嫌伊頇顢；有的soah keng-thé 伊講，頭殼pha-tái。伊著是按呢一个儂，小可阿哩不噠，規日悾戇悾戇，踅神踅神，不時脫箠，做一寡戇代誌。 Chhiū-nâ-lāi, hit chiah o·-a, seⁿ-sêng kó·-ì kó·-ì, gōng-ti̍t gōng-ti̍t. Se̍k-sāi i ê lâng, bô kúi ê kóng i hó ê, tek-khak sī chió lâng o-ló, chē lâng hiâm. Ū-ê kóng i tiong-hō·, ū-ê hiâm i ham-bān, ū-ê soah keng-thé i kóng, thâu-khak pha-tái. I tio̍h-sī án-ne chi̍t [...]
烏鴉佮狐狸【烏鴉啉水】
樹林仔內，有一欉老杉仔樹。老杉活幾若百年啊。樹身真正粗，拍算五个大儂撏（siâm）bōe倚；樹欉嘛有夠懸，kiám-chhái七八棧樓hiah-ni̍h懸。樹頂有一个鳥岫，樹骹有一窟地洞。鳥岫滯一隻烏鴉；地洞滯一隻狐狸。 烏鴉生成古意，佫朝直；狐狸做儂自本奸巧，佫狡chè。 【烏鴉啉水】 有一日，烏鴉出去chhit-thô。伊飛出樹林，飛過山墈，飛過畻莊、飛過草埔、飛過沙漠……飛真久，嘛飛真遠，飛來到一窟拍石仔坑。烏鴉飛kah真siān真悿，感覺喙焦喉渴（chhùi-ta âu-khoah），伊決定卜歇喘一下。天ta̍uh-ta̍uh-á變暗，伊歇佇路邊，卜揣看叨位有水通啉無，實在乏（ha̍t）kah強卜蹺去。伊四界bāi，四界看，大bóng四界soah揣無半滴水……烏鴉真正失望，soah倒佇骹塗兜，做伊睏去。
鱷魚佮猴
——本文照同名（tâng-miâ）英語短篇小說（siáu-soat）改編 編譯：Limkianhui 非洲有一條誠長誠闊的溪，有兩尾鱷魚（kho̍k-hî）滯佇hia。兩爿邊（lióng-pêng-piⁿ）的溪岸，有誠濟棕仔樹（chang-á-chhiū）。溪中央有一个海嶼，頂頭有誠濟弓蕉欉。 有一工，兩尾鱷魚佇咧水面頂泅來泅去，大尾鱷魚kā細尾鱷魚講，「乖囝的，汝看岸頂hit欉棕仔樹！有趣味無？」 細尾鱷魚按大尾鱷魚指的所在斟酌看去，啊！的確有一隻猴仔囝，佇棕仔樹頂懸teh捙跋反（chhia-poa̍h-péng）、變猴弄，實在誠古錐。 「乖囝的，恁母仔——我，即幾工仔毋知乜代（mih-tāi），soah直直感覺喙pho-pho，無想卜食魚，亦無想卜食肉，kan-ta想卜食一个較清甜的、較無共款的。」
漁夫的故事（閩南話）
——本文照阿拉伯民間傳說《天方夜譚》（嘛叫《一千○一暝》）〈漁夫的故事〉所編譯 編譯：Limkianhui 往過，有一個掠魚的喪兇儂，厝內真窮真散。伊逐工透早天未光，著愛落海去討掠。毋kú，伊對家己有定一條規矩，一工拋網極加拋四擺niâ。 有一日早起，掠魚的照原早早出去討掠，khiám-chhái運氣無通好，伊連拋三擺網，啥物骨頭攏無拋著。看範勢，今仔日hoān勢著愛了戇工，掠魚的氣kah佇遐咧chhoh-kàn-kiāu。伊bōe死心，想講第四擺佫拋看māi。即擺hìⁿ一下佫較出力，規領網仔hiù出去，自然展（thián）kah平平平。等kah卜收網的時陣，soah感覺加足重的，任拖嘛拖bōe振動。「龜怪！敢是khê著啥物貨？」掠魚的sio-khóa 頓踭（tùn-teⁿ）一下，sī-sōa衫仔褪sak，緊緊tiô落水，骹手做一下出力，真無簡單chiah kā魚網仔拖上岸。展開一下看，哇！我káiⁿ啊！網仔內的物件，毋是魚，嘛毋是蝦，佫較毋是鰻！汝叫是啥貨？是一粒葫蘆形的、黃銅做的大甕！甕仔喙佫用錫封著，頂頭有頓大印，寫「所羅門」三个大字。 掠魚的本然拋無魚蝦，憂頭結面，taⁿ liâm-tong-sî拋著即號好物，拍算the̍h去市場賣，無賣一个三五十兩，無嘛有一二十兩，的確比賣魚賣蝦較好趁。掠魚的愈想愈sahⁿ心，歡喜kah喙笑目笑。伊用雙手kā甕仔siâm起來搖佮chhe̍k，soah感覺足重的，內底bōe輸貯（té）規甕tīⁿ-tīⁿ的物件。「阿娘喂，到底貯啥物碗糕骨頭，chiah-ni̍h重！Bē用得，的確著先kā伊開起來看māi。」掠魚的，自褲頭綾（khò·-thâu-lêng）拔一支刀仔出來，三下半手，著kā甕蓋的錫kiāu開，了後，伊kā甕仔mo·h懸，掠倒頭栽，出力chhe̍k，想講卜kā內底的物件倒出來。毋kú，chhe̍k規晡，soah無看著半項物件，巧怪啊！
龜兔鬥走
往過，咱攏知影講，龜佮兔捌比過，比啥貨咧？嗯，著是鬥走（tàu-cháu），比看啥儂走kah緊。結果，彼擺比賽，兔仔傷過風龜，愛弄拐仔花，拍算看貓無點，贏贏kiáu poa̍h kah輸了了，尾仔，對對去互龜贏去。當（taⁿ）照原佫來講龜、兔鬥走的故事，毋kú，即擺卜講的故事，kiau頂過無siâng款哦！到底是怎樣（cháiⁿ-iūⁿ）咧？斟酌（chim-chiok）聽，汝著知。 【故事的主腳（chú-kioh）】 未講進前，先來介紹故事的主腳。代先是小白兔。無毋著，伊著是頂過鬥走，比輸龜的彼隻白兔。第二，龜，伊嘛是頂倒（táu）比贏小白兔的彼隻龜。第三，是小烏兔，叫伊烏兔，事實伊毋是烏的，論真講伊是火烌仔色（hóe-hu-á-sek）的。頂過龜兔比賽，kiau小烏兔無底代，彼輒（hit tia̍p）伊拄好上山去割草仔，無閒。 【年號（nî-kō）】 明朝萬曆十七年（1589年），也著是神宗皇帝在位的時陣。（這kiám-chhái畫虎卵的啦……) 【所在】 中原河南嵩山（Siong-san）山骹的一條溪仔，邊頭的一條馬路，對面的一片竹仔林，內底的一片空地仔（khàng-tē-á）。（這嘛不止仔譀）
鬼頭牌注死丸
舊年做的一條「工商廣告」，有較各樣（koh-iūⁿ），講笑講笑nā-niā，心適心適，毋好傷頂真啦。 工商服務，食好鬥相報，好藥報汝知 各位親愛的聽眾朋友，又佫到kah工商服務的時間囉，今仔日，卜來共逐个介紹的即帖藥方，號做「鬼頭牌注死丸」。即帖藥仔，伊有啥物路用，是咧食啥物症頭的，請聽我詳細來講紲落去。 人生短短，凡事凊睬著好，朋友弟兄，海海就是，計較無路駛。各位聽眾朋友、儂客倌，儂佇咧講「儂死百百款」，有的百年老死，有的身苦病疼死，有的出門車轂死，有的水鬼仔拖去死，有的跳樓自盡死，有的食飯kê死，有的雷公摃死，有的平平路摔死……總是，一儂死一樣，無儂死親像。
第一通，陳紫峰
（即个古，是照“晉江電視台”《僑鄉頻道》共名節目落去改編的，改編者：Limkianhui） 紫帽山佇晉江西北勢的紫帽鎮，算做是戴雲山脈在佇東南即勢的一條尾溜。紫帽山佮泉州清源山是“對山”，遠遠攏會得通相看。清源山，石頭生做三角六耳，實在有出名；紫帽山，光景夠pān水，確確嘛是儂看儂謳咾。紫帽山攏總十二粒山頭，伊的形，著ná親像古早的烏紗帽，頂面佫定定有hit號茄花色的雲霧佇咧框來踅去，看着bōe輸一頂茄花色的帽仔，毋chiah號做“紫帽山”。紫帽山上蓋懸的所在517.8公尺的海拔。古早儂講“山不在高，有仙則名”，確確是安呢。一座山，卜出名，毋nā光景愛水，佫較要緊的是愛有文化做根底。紫帽山歷來著是hiah-ê斯文儂或者公子爺愛來的所在。明朝有一个理學家，講起來嘛是咱晉江的才子，伊名號做陳琛，伊是真合意這紫帽仔山，應信將家己的字號換做“紫峰”。陳紫峰是晉江陳埭涵口儂，明朝成化十三年出世，也著是西元1477年。伊少年的時陣，捌滯咧紫帽山主峰的金粟洞小丹邱古元室讀書，後來中進士，做官做到吏部考功郎中，食老無愛佫做官，倒轉鄉里，69歲過身了後，風水著做佇紫帽山hit-tah的秀林山。
皇帝娘 無 趁食諸姥 的 快活
"當后何如當妓樂"（Tong hō· hô-jû tong ki lo̍k），即句話是南北朝時期北齊的胡太后講的，意思是講"做皇后無通做婊的暢（thiòng）"，相信真濟儂聽了後攏會笑kah落下骸。俗語講，一樣米飼百樣儂，世間十色儂，各儂穡路無相共（sio-kāng）。各項職業在本無應該分好歹、懸下（koân-kē），儂伊胡太后興做即途，倒咧趁，佫有通爽，這是儂的自由。香港有一齣电影號做《性工作者十日談》，當中，有一个趁食諸姥，名號做"happy"，伊講伊對家己的要求著是做一个樂暢的妓女，做即途愛即途，總是較按怎講，著oân-á感覺有淡薄仔是咧強逼家己苦中作樂，心頭未免會酸酸搐搐（tiuh-tiuh）。總是，儂胡太后伊是真真正正的"happy"，即種情形，確實有較罕見。是講，因何做皇后soah會較輸做婊？請聽我來詳細講sòa落去。 胡氏本然著是一个美人，出世佇大厝宅的好額儂兜，伊後頭厝oân-á算講有頭有面的pâi-chí儂。朝廷選美的時陣，胡氏因為生做出擢（chhut-tioh），選有著khau，入宮了後，冊封（chhek-hong）伊做長廣王妃。武成皇帝高湛繼承北齊皇位了後，又佫封伊做皇后。不而過，胡氏soah得bōe著皇帝的疼愛佮寵恿（théng-sēng），伊oân-á佮濟濟嬪妃共款，互武成皇帝tàn咧邊仔，有棺材無靈位。總是，胡太后伊毋甘鬱滯深宮守活寡，自安呢想空想縫，變東變西，七創八創。
祖家姓林的來路
白話字（POJ） 漢羅 Goá sī lán tsāi-toē ê Chiang-chiu lâng. Goán chhù tī Pe̍h-tsúi Soaⁿ-piⁿ chhoan, goán hit siā hō-tsoè "Kau-boé" siā.Goán sī chiàⁿ-káng ê lông-chhoan-lâng, thiaⁿ leh kóng, tsū goán sèⁿ Lîm ê khai-ki-tsó· lâi chia khiā-khí kàu taⁿ, lóng teh tsoè-chhân. Goán hia Lîm sī toā sèⁿ, sì-kho·-lìn-tǹg 3-4 ê chhoan (chhng), tàu-chiūⁿ 10 [...]
-
寶惜環境 寶惜地球 咱做夥來…
在線閩南語字辭典現查
版權
：歡迎加入《有緣來做夥》QQ陣（陣號：81229762）
