「閩南話」往過叫啥物名
往早，佇咱中國福建省內部，福州儂、閩北儂稱呼咱的話是「下南腔」。福建舊早儂講「八閩」，著是有八个府，分別是：頂四府「建、延、邵、汀」；下四府「福、興、漳、泉」。下四府，又佫分做「頂勢府」佮「下勢府」。所講的「下勢府」著是「漳、泉」兩府。頂勢府的儂，叫下勢府漳泉即角勢的儂號做「下南儂」，所以chiah有「下南腔」的講法。「下南腔」是佇福建省內部講的，出省了後，著無儂按呢講囉（台灣當時算福建管的，佫台灣的唐儂大半是漳泉過去的，所以英國儂余饒理佇台灣出版的《三字經新撰白話註解》嘛將台灣儂所講的漳泉話講做「下南腔」）。 來講，佇咱漳、泉兩府內部，包括同安、廈門，講話相通，講的是共一號話，總是腔口無攏相siâng。中國儂攏知影講，中國的話真濟，一省一號話，互相無通話。橫直，若是講勿會通的，咱儂攏共儂講做是「外江話」、「外省話」、「北頂話」chiah-ê有的無的。相對著「外江話」、「外省話」、「北頂話」來講，咱漳泉的百姓，叫家己的話是「咱儂話」、「咱厝話」、「咱tè（tèr）話」、有時仔嘛會講「咱下南話」。「咱tè（tèr）話」意思是「咱即tè的話；咱即个所在的話」。這攏是咱漳泉儂家己內部咧叫的名，出外口，拄著別所在的儂，著無咧佫用即款名號。 中國各所在，攏有家己的「本地話」（在地話）。本地儂往往講家己的話是咱「土話」、咱「本地話」。這是就「官話」的角度來講的。閩南儂嘛是共款有按呢講。Ah若「白話」，是相對「漢文（文言）」的角度來講的。比論講，父母定定共囡仔講「出門佮儂講普通話，轉來到厝裡，對父母序細、鄉親序大，換講白話著好啊啦」。白話字，意思著是「用咱家己鄉里的白話寫出來的字」；白話文，嘛是共款的意思。廣州話當（taⁿ）互外口的儂叫做「白話」，論真講，彼自底嘛不過是廣州儂家己咧講，路尾詞義擴大所起致。 漳泉儂出外口、過番的、行洋的，自來真早，真濟。往過，咱儂出去外口，若是對別儂講起著咱的話，較濟是叫做「福建話」（彼陣猶未有儂講「閩南話」即个名號）。別儂聽咱講話，嘛順趁咱的喙，叫咱「福建話」。
正音字例
每一種語言攏有一定的語法、語音標準，超出即个范圍者，著是「無標準」。唸毋著音、呼毋著調，這號做「choa̍h音」。咱儂的語言，是自然語言，會變會轉，這是無毋著。雖罔是安呢，語言佇某一个時代又佫是相對固定不變的，著是因為安呢，chiah形成一定的規範佮標準。簡單講，規範、標準，可比一條索仔，共語言本身，hām佮使用語言的所有社會儂，束縛tiâu咧。所以，嘛chiah有「正音」佮「choa̍h音」即兩个相對的概念。 正音、choa̍h音，當然只不過是相對的概念nā-niā。現子時是正音，無的確佇往過幾百年前soah kan-ta互儂當做choa̍h音niā；反倒轉，即mái咱講是choa̍h音，iah毋佫佇幾百年前hoān-sè是正音。瞭解即个道理，來講sòa落去，嘛chiah有意義。 閩南語，普略仔來講，會當分做三大音系——漳音、泉音、廈音。每一个音系又佫湠叉（thòaⁿ-chhe）做濟濟種無共的腔口。像咱定定咧講某物儂是漳浦腔，某物儂是同安腔，某物儂是晉江腔、南安腔、惠安腔、龍海腔、雲霄腔、安溪腔、廈門腔、鹿港腔、宜蘭腔……hâm-pa-lāng所有chiah-ê腔，濫摻來組成閩南語（漳泉語）語言系統。若是有佮即个系統無相匹配的，咱講he著算是無正。 有一寡情況是，個別儂唸無正，是個性的問題，帶有偶發的性質。另外有一款較嚴重的，比論講有某一个所在，某一个韻部，全部攏chiâu唸tâⁿ誤。即款情形，往往來講是有一暫ā，毋是最近chiah起變的niā。這比論講，佇漳州龍文區、薌城區hit tah（屬龍溪腔），前、後鼻音唸對調；泉州石獅市（屬晉江腔）半鼻音（鼻化韻）拍無去；閩台濟濟少年家/g/子音（聲母）拍交落（phah-ka-la̍uh）……像即款規phâng規片唸無正的，因為年久月深，taⁿ有的已經定型成做新的腔口。所以，這真正過頭繁複，毋是三兩句話講會當清楚。咱今仔日，上主要beh來探討頭一種情形——帶有非共性、偶發性、習慣性的choa̍h音。咱sòa落去，beh直接用例字的形式來講解。總講一句，我是起一个頭niā，朋友nā有beh補充，ia̍h者是有任何的意見佮建議，歡迎做伙來探討，有話盡講，毋免客氣，嘛免歹勢。Thank you.
矸轆
阮做囡仔hit陣，chhit-thô物仔，會使講是不哩仔濟。像倒手爿即幅圖，畫的即款物件，嘛是一款囡仔sńg，這號做「kan-lo̍k」。閩南在地有一句俗語話「kan-lo̍k相換釘」，較有歲的儂，攏知影。 Kan-lo̍k，普通話講「陀螺」，滯巷仔內的儂攏會知，he正港一箍圓圓lìn-lìn遨（gô），一條帶仔（tòa-á）牽咧se̍h-chhit-thô。早前的kan-lo̍k，佇咱福建南部chit-tah，某儂我看有著的，計計是像倒手爿hit幅圖咧畫的安呢——身是鴨卵形；頭頂略仔（lio̍h-á）尖尖，像ná竹笠仔面共款；下底嘛尖尖，佫chhiám一支四角釘，正港「頭尖尾尖，放屎臭蘞蘞（hiam）」。較早，佇咱庄跤（chng-kha）所在，三五个囡仔黨，落課放暇（pàng-hē），相招鬥伴，常在（chhiâng-chāi）滯咧厝前厝後、巷頭巷尾的粟埕ah是hit-lō空地仔（khàng-tē-á），佇hia咧「釘kan-lo̍k」，拚輸贏、見公母（kìⁿ-kang-bó）。Sńg「kan-lo̍k」的方法，講起來濟濟種，逐種著有撇步，著有鋩角（mê-kak）佇咧。這nā是捌sńg過的，儂自然著會知。Ah nā毋捌sńg過的，he著有影kài費氣，講kah互汝捌，喙鬚著拍結；講kah互汝明，天著烏一爿……歸氣mài講，較清閒。 儂客啊，失禮啦，咱nā感覺某儂我雜唸佫gâu牽絲，講規晡，講kah喙角全全phoe̍h（泊），soah全講一寡有的無的，無營養的，安呢汝通冗早（liōng-chá）越頭，較免浪了時間，害汝青春無了時。Ah nā感覺有趣味，汝著寬寬仔序，聽某儂我liâu-liâu仔來講sòa落去。儂客啊，汝敢是想講某儂今仔日是beh來kiau恁拍kan-lo̍k，拚輸贏是毋？哈，真歹勢啦，佫互恁失望ah……拍kan-lo̍k我雖然是內行，ah毋佫，今仔日真正毋是beh sńg這。所以，咱做汝毋免青驚，我bē共恁術，嘛bē共恁贏鐳（lui）。某儂今仔日無beh講kan-lo̍k按怎釘，正經beh來講kan-lo̍k按怎寫。請咱著斟酌聽，看詳細，sian-sian著毋通拍làu-kau。 我捌看有儂共「kan-lo̍k」寫做「干樂」，講一句較無hau-la̍k的，真正bē看得死！按 怎講？我講一个chiâⁿ實的互汝聽，聽了，汝著bē嫌我hau-siâu哺舌。我捌看台灣電視有一擺拄好咧搬一齣記錄片hām「kan-lo̍k」有關係的……看kah一半，尿緊，出去放，放好佫入來看，雄雄影著電視螢幕浮字寫講「小時候，媽媽和我玩干樂……」Hâⁿ？！這啥siô？「玩干樂」？佫「和媽媽」……哪會安呢？Thái-ko鬼，不四鬼，lah-sap鬼！……講真的，若是kan-na看著「干樂」，恁爸會lia̍h准是hit-lō毋成cha-bó· ham 契兄相招去賓館咧嘿咻，佇hia咧「我爸（pē）我母（bó）」，越干越快樂（yuè gàn yuè kuài lè）」……所以講，像即款sa咧烏白寫，烏白chō，真正會害死儂。 即chām仔，工場換徙（sóa）去漳州，規日走前走後，歷來歷去，無閒kah強強beh消筋去。前幾日仔，按火車站坐BRT公交車beh倒來集美，佇車頂電視看著一支關係著「陀螺」的廣告，佫引我想著「kan-lo̍k」即个名詞。坐咧車頂，無gī-niū，神魂一半tòe車行，無gî悟，soah佫來想著「kan-lo̍k按怎寫」即个「看猛猛（mé-mé），做較oh」的問題。Kan-lo̍k，矸碌？矸轆？到底是siáng較倚意，無講毋知機，講破毋值錢。 矸（瓶），俗字。Kan-lo̍k佮矸（瓶）有一步kāng，平平攏圓身，長長，sán梭sán梭。 碌，碌碡（la̍k-ta̍k），較早農業社會做田儂咧用的一款傢俬，有的用咧研（géng）粟研米，有的用咧駛田，駛牛犁，研塗坯。外形oân-á圓身的。 轆，【集韻】車軌道謂之轣轆。又繀車。【正韻】車楘也。現代北方話咧講的「轆轤」，用佇真濟無共的生產線。下佇井墘吊phoa̍h桶上水（chhiūⁿ-chiú）的的，閩南語叫做tiàu-o·；鬥佇犁耙頂頭ûn牛繚的滑輪，閩南語叫做ka-lak……轆，照講是「下入」，ka-lak唸「上入」，敢是有因依？ Kan-lo̍k，beh寫做「矸碌」抑是「矸轆」，某儂感覺攏有倚意。矸，kiám-chhái是借字niā，未必然會准得算。碌、轆，計計有合（ha̍h）著意思，某儂主張用「轆」字。
「赸」佮「訕」
今仔日毋是卜來講古，是卜佮逐个來探討兩个「字」。即兩个字，普通時仔定定有咧講著。啥物字咧？無講汝毋知，講出來，汝著知。一字是「soan-siâu」的「soan」，佫另外一字是「偷soan出去」的「soan」。在佇閩南語來講，即兩字唸共音，平平攏chiâu唸上平（chiūⁿ-piâⁿ）。進前，捌聽著有儂咧問即兩字（漢字）卜按怎寫。我想講，無咱即陣著來共開破看māi。 一、代先，咱來講「偷soan出去」的「soan」。若照hit號較倚意（oá-ì）的字來講，會當先候選即三个字：「赸」、「跚」、「辿」。了後，來比看叨一字上kài有合(ha̍h)。 1、赸：所晏切。離去/走開[go away;leave] 。赸撒(退走;退散)。「你也～，我也～，請先生休訕。」 2、跚：【廣韻】蘇幹切，【集韻】【韻會】相干切，音珊。蹣跚，跛行貌。【類篇】行不進。又與散通。【史記•平原君傳】有躄者槃散行汲。【註】散亦作跚。蹣跚,也作“盤跚”。跛行;行不進貌 [walk haltingly]。如:跚跚(行步緩慢從容的樣子=行路沓沓仔序/寬寬仔序的體) 3、辿：【篇海】醜延切，音脠。緩步也。徐緩（步伐）：「那師父手軟勒不住，盡他劣性，奔上山崖，才大達～步走。」 從中，通知影講「赸」字上倚意，ah「跚」字第一倚音，「辿」字一丈差九尺。若卜做正字的規范，我建議來揀「赸」字。 二、佫來，換講「soan-siâu」的「soan」。即个「soan」，事實學界早早著有儂主張講是「訕」。「訕」字，有【廣韻】所姦切、【正韻】師姦切，音刪。又【集韻】師閒切，音山，義同。普通話有「訕笑」（譏刺,挖苦 [mock;diride;ridicule]），閩南話正正著是「soan-siâu、摳削、摳洗」的意思。古早的記載也有通稽考： 見朝廷有所任使,非其資序,則相議而訕之。——王安石《上仁宗皇帝言事書》 偏加些惡謔毒訕。——清• 孔尚任《桃花扇》 所以，某儂我主張「soan-siâu」的「soan」寫做「訕」；「偷soan出去」的「soan」寫做「赸」。
閩南語(廈門話)佮官話親緣度的分析（鄭張尚芳法）
咱儂2007年年尾，有寫一篇《閩南語與漢語官話的親疏關係》(2008.1.18）。即篇完全是按照美國語言學家斯瓦迪士（Morris Swadesh）提出的“人類語言200个核心詞”做標準來造表，比對廈門話佮北京話中間的異同。即篇文tah起去了後，有的儂現講“斯瓦迪士300个核心詞無適合摕來比對廈門話佮北京話的異同。”理由是：當時，斯瓦迪士提出200个核心詞是為著考察無siâng語族的語言，即張表伊無適合摕來比對siâng語族內部各種語支中間的关系”。潮州揭陽曾俊敏先生另外有介紹一張表格，是學者鄭張尚芳先生設計的《华澳语言比较三百核心词表（征求意见稿）》： “是对于Swadesh众多修订中比较有名的一个。当然，郑张先生这个表照样有学者批评（学术这东西，永远是没有终极版本的）……不过，大家只要在同一语境（量表）下按同样标准操作，就可以了……这已经是按照学术的规矩行事。我们能做的也就是这样，不必奢求一步到位地到达物自体的彼岸——彼岸或许永远不可及的……郑张尚芳先生这个表(注：提供官話核心詞——‘對比的標準’)，主要目的是用于寻求语言之间的发生学关系的，也就是真正意义的亲缘度，而不是语言之间的接近度。但就像Swadesh的表可以用来测量语言之间的同源与接近又可以用来测量两种同源语言分开的年代（语言年代学）一样，郑张先生这个表我们也大可以用于这些方面研究的”〖潮州：曾俊敏 語〗 無偌久進前，我按照鄭張尚芳設計的即300核心詞，摕來比對廈門話(Amoy)佮普通話(Mandarin)的親緣度。比對的結果（下載）表明，廈門話佮普通話的親緣性 量其約 佇67%~72%中間。即項結果，phēng直接摕斯瓦迪士200核心詞做比對的結果（Limkianhui:56.33%；王育德:48.9%）較懸不止仔濟。 ps.佮本文有牽連的文字——《閩南語與漢語官話的親疏關係》(2008.1.18）
閩南語與漢語官話的親疏關係
（來講閩南語佮北仔話，in中間的親緣度） 頂世紀，滯佇日本的台灣儂王育德（1960年）研究發見講，閩語廈門話佮北京話中間“同源詞”乾凋佔48.9%（有的講51.56%），比英語佮德語“同源語”的比例(58.5%)佫較下（kē）。也著是講，設使用“同源詞”做標準來比較語言的親近度，安呢，閩南語佮北京話相差，會比英語佮德語相差較大。王育德當時的研究方法，主要是比對詞彙的文字表現形式，無牽涉著語音的比對。王育德佇咧做統計的時陣，包括兩部分的工課。第一部分是比對200个基本詞彙佇各種語言當中異同數，採用的方法是算術統計法；第二部分是按照M.Swadesh提出的計算公式，來計算五大漢語“方言”分化的年代。 王育德先生當時的研究資料我無瞭解。頂幾日，我家己親身做一份統計，共款是對比廈門話佮北仔話的異同，平平是用美國語言學家斯瓦迪士（Morris Swadesh）提出的“人類語言200个核心詞”做標準。比較了後，oân-á有做一份表單出來。統計結果，發見廈門話佮北仔話親近程度會通達到56.33%，比王育德做的佫較懸。（表單下載） ps. 1952年，美國語言學家斯瓦蒂士（Morris Swadesh）主張用“人類語言200个核心詞”來統計確定語言分化的年代，後來，伊又佫按即200个核心詞當中揀100个“上蓋穩定的核心詞”出來。學界將伊路尾摘出來的前100个詞號做“一階核心詞”，另外佫剩100个詞，歸做“二階核心詞”。
關係閩南話廈、漳、泉e/oe/er中間的對照
閩南話廈漳泉三个代表点，雖罔各儂有各儂的腔，不而過，中間往往有不止齊斬（chê-tsáⁿ）的對應關係。眞濟儂khiám-chhái攏有發見講，廈門音佮漳州音"開合"對調（flip-flop），汝講"hé-koe"（火雞），我講"hóe-ke"；我講"phôe-ê"（皮鞋），汝soah講"phê-oê"……有影眞心適。咱即陣著卜來kā做一歸納，khêng-khêng清清咧，看中間到底有啥秘訣無。 普通若講到閩南語音系，往往牽涉著文、白兩手，taⁿ咱著順著即兩路，來挽瓜chhiû藤。 一、文音（讀冊音/孔子白） 1、文音chiâu-chiâu唸e，三所在攏無話音。比論： 系（係、繫）、計、麗、濟、啓…… 2、文音chiâu唸e，有話音（漳：e，泉/廈：oe）。比論： 地、雞、體、溪、細、第（廈）、齊、蟹、髻、洗 3、文音chiâu唸oe，大部分無話音，一半字仔有。比論： 最、悔、衛、會、恢、衰、杯、背、歲 4、文音chiâu唸oe，話音攏無siâng（漳：oe，泉：er，廈：e）。比論： 罪、灰 二、話音（講話音） 1、漳：e；泉：er；廈：e。即款型的，字數眞少，出現的頻數無懸。 短、脆、螺、坐、gê（gê神：討厭） *促音：雪、踅、嗝、厄 2、漳：e；泉/廈：ue。即類的，有較普遍，出現的頻率眞懸。 蟹、街、雞、鞋、契、粞、疏、初、鑢、細、濟、買、賣 *促音：節、截、八、絕、鍥、狹 3、漳：oe；泉：er；廈：e。屬佇即類的，ûn-á bōe少。 過、歲、科、吹、馃、火、睡、陪、垂、詼、箠、妹 *促音：卜（beh）、說、e̍h（厚e̍h） 三、例外的情形。 1、漳：oe；泉/廈：ui。即類的，出現的頻率眞kē。 梅、玫 *促音：血、拔 2、漳：ee；泉/廈：e。 茶、家、馬、罵、蝦、爬、假、下、廈、霞、暝、嫁、把…… *促音：隔、客、硩、白、麥、冊、徹、屑、搿、伯、栢、百 3、漳：oee；泉/廈：oe。 話、花、瓜、化 4、漳：oee；泉/廈：ui。 畫 *促音：劃（筆劃） 頂頭的小資料，提供互逐个參考運用。總是，這內中猶原佫有濟濟規律需要斟酌來清來理，望各位普通時佇咧運用的時陣，著愛詳細，毋通七鬥八鬥，豬母牽對牛墟去，安呢著害了了囉。
“风”字的呼音——hoang/hong/png/（泉）、hong/puiⁿ（漳）
我是咱在地的漳州侬，阮厝伫龙海县白水镇（自较早，侬拢讲“白水营”）。阮是农村侬，细汉的时阵，滞伫阮遐，有听着一句鬥句话，讲号做“乌huiⁿ，乌huiⁿ，咬尻川”（白话字：o·-huiⁿ o·-huiⁿ kā kha-chhuiⁿ）。这是大侬咧哄吓（hōng-heh）囡仔“暗时上好毋通出门四界行、四界走，若无，注死（凑拄坎）去拄着乌huiⁿ，安呢着会去互伊咬尻川”。 乌huiⁿ，是一种蛇，规尾乌趖趖，拢暝时出来讨食。听咧讲真恶，佫会咬侬。较早农村所在，公共设备拢真两光，真落后，无电火柱，到kah 暎暗时仔，一四界暗摸摸，出门着爱紥电火，那行那耀路（chhiō-lō·），惊讲去踏着牛屎啦，蛇啦……ah嘛较bōe tio̍h-tak 跋落水沟仔。是讲，he夭寿 乌huiⁿ，拢是暗时出来chhōe食，害死 hiah-ê过路侬 惊kah无性命。热侬（joa̍h- -lâng：热天时）的六七月仔、八九月仔，乌huiⁿ真捷出来，有时仔 瘟滞 田岸仔，有时仔 伫 巷路 loa̍h-loa̍h趖，有时仔 佫会 趖入去 侬兜的灶跤仔、厝间ê……讲起来，有影真恐怖。 “乌huiⁿ”，是漳州腔，厦门腔号做“乌hng”；同安腔讲做“乌png”。讲法 虽罔 各样各样，毋佫，讲的拢是共一种蛇。中国真濟省份，拢会当看着即号蛇。英文名“Zaocys dhumnades Contor”，普通话叫做“乌风蛇”、“乌梢蛇”，根据瞭解，伫“安徽、浙江、江西、福建、河南、陕西、甘肃、四川、贵州、江苏、湖北、湖南、海南、广东、广西、台湾……” chiah-ê所在拢有记载。 “乌hng（厦）”、“乌huiⁿ（漳）”、“乌png（同安）”，是咱闽南话的詞彙，正港的在地話。有的字典，照字音写做“烏昏”，我看這是照音鬥字，無算是本字。中国别所在讲做“乌风蛇”，这拄仔好佮咱闽南语有对同。
“以”母字，閩南語呼“塞擦音”、“擦音”的例
中古漢語“以”母字，佇現代閩南語（漳泉）讀冊音，攏全呼做“無聲母”的；不而過，白話音著無一定呼“無聲母”。有寡仔“以”母字，佇現代閩南語，in的白話音hoān-sè種著（chéng-tio̍h：遺傳）上古漢語，致到（tì-kàu）in的生做soah無siâng近祖“中古音”，這oân-á通講是“返祖”。這著是語言學界定定咧講起的“以母、邪母呼共音”（以母讀同邪母），會當講是“閩語系”的一个“共性特徵”。像即款白話音真正各樣（koh-iūⁿ）的例，講起來是無濟，chhē-chhē咧，嘛chiah kan-ta chhē著十捅个字nā-niā。列表舉例如下。 ̍ 例字 中古聲母 閩南語呼音 讀冊音 白話音 詞例 榕 以母 iông chêng（泉）、chhêng（漳） 榕仔樹 液 以母 ie̍k sio̍h 手液、跤液 翼 以母 e̍k si̍t 翼股 簷 以母 iâm chîⁿ 簾簷 （nî-chîⁿ） 延 以母 iân chhiân 延延 （iân-chhiân） 蠅 以母 êng sîn 胡蠅 鹽 以母 iâm sîⁿ 鹽鹽 （iâm- sîⁿ） 癢 以母 ióng chiūⁿ 皮膚癢 恿 [...]
-
寶惜環境 寶惜地球 咱做夥來…
在線閩南語字辭典現查
版權
：歡迎加入《有緣來做夥》QQ陣（陣號：81229762）
