豬哥亮重出江湖，一集二十萬？
豬哥亮kā家電商燦坤做的廣告，taⁿ已經播出來囉。聽咧講，伊決定卜復出，iah毋過，具體卜按怎復出，猶原iá未決定。報道講，即兩工仔，in後生，有去上網chhiau著濟濟BBS留言，hām kah網路頂懸的影音信息，招伊（豬）來看，伊soah ná看ná激動，看kah目屎雙港倒。講一句「唉喲，汝娘較好咧，恁爸佫chiah厲害噢？！」實在無法度相信猶佫有hiah濟儂佇咧關心伊。 招伊來翕廣告的導演范可欽講，豬哥亮仔即chām真數念往過，逐擺nā講電話都（to）會講kah流目屎，即幾日，不時攏嘛吼kah雙目紅佮腫。聽咧講，頂幾日仔，豬哥亮翕hit支感謝的影片，因為錄影帶內底，bē記得kā楊登魁說多謝，過後直直感覺誠不安。范可欽chiah kā伊安慰，苦勸伊講「無要緊啦，儂 楊董ê bē hiah-nih gâu計較啦！」 廣告內底，豬哥亮有演一个「胸圍42D」的「豬小姐」。造型師透露講，演豬小姐難度傷懸，事先著愛替伊修面、做面、糊面，真厚工；為著卜做hit對42D的奶部（leng-pō·），一時，連保險套嘛攏sa出來咧灌水……尾仔，chiah決定鬥一對假奶。 4月28號，製作儂沈玉琳講，有想卜佮豬哥亮仔合作辦節目。伊講節目名嘛攏想好ah，一是「逐ê來牽豬哥」，二是「豬哥亮不亮」，是一檔a-kah會通做兩點鐘久的大型豪華歌舞秀，節目基本形式kiau當初時「豬哥亮餐廳秀」差無真濟。講kah主持的價數（kè-siàu），沈玉琳講，豬哥亮上濟一集20萬。 ps. 豬哥亮上新的廣告——「燦坤0元本舖電器醫生篇~冷涼卡好!」，請看下底的視頻（中國的網友請用代理服務器）：
豬哥亮復出
豬哥亮仔講： 「大家好」，我是豬哥亮仔，十外年啊，攏無佮咱做伙，十外年嗚，因為我出國深造，所以chiah離開十外年，ah即mái十外年乎（ho·ⁿ），深造已經倒轉來。上重要著是卜感謝咱遮个媒體、遮个記者、先生小姐，誠厲害，有法度通去遐翕我hit張食烏輦（o·-lián）的像片，iah也有法度通佇咧板橋（Pang-kiô）翕著我。我感覺誠歡喜，chiah互我有感覺一个勇氣，通好佫再行出來。恁逐个咧chhōe我，我攏知影，但是我一直乎，想卜復出，也決心卜復出，但是攏無hit-ê勇氣，我毋知卜對叨位復出啦。誠好，也tn̄g著一寡朋友，余天啦乎，高凌風啦，安呢共我鼓勵，iah尾仔咧，上重要的，著是咱即个大導演，咱即个范可欽。哇，誠好，一世儂我毋捌看導演遮愛我，遮合意我，絕對卜互我拍即支廣告，互我復出，在即段時間，因為我頭毛傷短，iah著十外年無去台頂ah，iah即个表演我毋知卜對叨位來，無hit-ê形體通走出來。毋過咱即个導演厲害，也會曉去共我chhoē一个假頭毛。導演佫會曉共我chhoē即軀衫仔褲、西裝，佫共我叫一个設計師咧共我設計。我chiah去照鏡，發現著我乎（ho·ⁿ）…毋，十外年前去出國深造倒轉來的豬哥亮仔，真正bē bái，猶有即个勇氣。Iah我卜對叨位復出，ah著愛看即擺的機會，卜拍即支廣告，bē bái，誠好。嗚，即个導演喙咧講愛我，咧試我的功夫，咧共我磨。即支廣告，我一个儂演五个角色，也演「豬奶奶」，也演「豬小姐」，也演醫生，ah佫也演一个…我六十幾歲ah，猶佫演he七歲的neh…無簡單neh！所以即支廣告我拍了，嘛家己感覺誠歡喜。今仔日記者會，我本來哦…想卜來開一个仔記者會，毋過，我著毋捌咧開記者會的儂咧。Ah我感謝逐个，ah恁愛我出來，恁愛佫共我鼓勵，愛共我支持，乎（ho·ⁿ）….我會等恁，感謝恁，期待我的廣告。……詳細情形請看下底的視頻：
《闽南之声》广播错误的读音实在有够濟
《閩南之聲》廣播，是廈門人民廣播電臺佇舊年（２００５年）開通的一个新的廣播頻道，用閩南語放送。本然，我是久久攏無咧聽廣播囉，算算咧差不多三四年啊。Ah今仔日，想講bóng來去kā聽看māi咧。這是頭一擺聽《閩南之聲》廣播，儂佇咧外省，無法度用收音機聽，我選擇在線收聽。 進前，lio̍h-á有聽朋友講起《閩南之聲》廣播，總是「濟儂呵咾，少儂嫌」啦。見擺聽朋友講起，我攏tiām-tiām無做聲，因為我無親耳空聽著，毋敢烏白kā儂講東講西。 今仔日早起，量其約仔十點捅仔開始，佇線頂聽一tiap久仔，具體是tó一檔節目，咱mài kâng「點油做記號」啦，因為咱sòa 落來，beh講的攏是一寡kâng嫌的話，所以，mài kâng 叫名叫姓較好啦。 雖然是聽一tiap久仔，不而過，講正經的，咱是聽 kah雞母皮強強beh giâ起來，愈聽愈掠狂，實在聽攏bōe落去啊，歸去 禁禁捒（sak）較清閒！
台灣樂壇名儂黃仁清 按算廈門收徒捒閩南歌
前兩日仔，台灣流行歌詞曲創作人黃仁清先生（捌寫過新年名曲《財神到（財神到）》）來佇廈門訪問，為伊的新專輯《豬年肥年》做宣傳。伊講，除去宣傳新作，佫卜借著佮廈門衛視《閩南行透透》（欄目）合作的機會，佇閩南所在收幾个仔 司仔（sai-á）。 黃仁清老先生，今年70幾啊，chêng早前 著 不止 有名聲，伊thèng講是頂世紀六七十年代tiàm台灣流行歌壇 hoah水會堅凍 的 排子儂（pâi-chí-lâng），算講是siǎn-pái to̍h tio̍h ah。真濟大牌的明星（miâ-chhiⁿ）攏捌kiau黃老先生合作過，汝像講鄧麗君啦、龍飄飄啦、江蕙啦……實在講bōe息了（bōe-sit-liáu）。
中國頭一齣閩南語生活片，台廈合作
昨昏頂晡，廈門衛視慶祝開播兩週年，siâng時佮台灣萬星傳播股份有限公司交換合作契約，雙方約定佇咧無偌久以後將卜聯合製作一齣閩南語生活片。這嘛是中國頭一齣閩南語情景劇，片名暫時號做《一定beh幸福》，聽咧講戲翕了後，卜siâng時安排佇廈門衛視佮台灣東森綜合臺播出。 根據瞭解，即齣戲大多數會安排滯廈門翕錄，地點會揀佇咧鼓浪嶼、中山路，抑是講環島路chiah-ê所在。 戲齣總製片是台灣儂，名號做蔡見賢。主要的演員有三个，嘛攏全台灣藝人，聽講是張靜儀、王中平佮玉尚。Chhun-ê一寡較無要緊的演員，按算滯廈門在地公開來招。 劇情主要描述兩个家庭中间的生活交插、情愛瓜葛，親像大家（ta-ke）新婦 即款的人情細事、亲情義理。兩家伙仔儂，一家佇廈門，另一家佇台灣。 戲齣暫時猶無法通按算攏總卜翕偌濟集，劇本嘛猶佫佇咧寫。編劇是一个佇廈門滯十外外年的台灣儂，聽講伊兩爿的情況攏真熟似。翕戲的手路，攏全採用台灣現時kài時行的做法，那翕那播送，不而過聽講卜比台灣戲做了佫較幼路。聽講，代先會先翕一个单元，翕煞了後開始播送，了後看觀眾的氣口啥款chiah佫來調整下一个单元的剧情、佈景hām演員的安排等等。幕後製作團隊嘛台灣儂為主，經驗不止豐富，做代誌是ná桌頂拈柑，輕鬆kah有chhun。 根據瞭解，進前台灣閩南語電視劇《青龍好漢》佇廈門衛視台播放，收視那chhèng那koân，相連sòa 13禮拜摕著廈門地區黃金檔的第一名。廈門衛視有關人士表示講，閩南語劇市場效益真讚，“真正會趁咧”，未來的確卜佫加大即方面的投資。
給廈門衛視的六點建議（華文）
今晚，又逛到了廈視在線，順便又提了些建議。覺得反正也不是什麽見不得人的話，乾脆也copy一份，貼在這兒。（全文如下） 每次回廈門，就會想起要抽空看看海峽衛視。可是，每次看一會，難免又很快失望，真的。因為，似乎很難找到那種熟悉地、特親切、特道地的閩南味，真的很淡。
楊麗花佮歌仔戲的鹹酸甜
本世紀華人傳奇人物的名儂榜，肯定有一位儂儂知的大明星：楊麗花（Iûⁿ Lē-hoa）。 楊麗花出世佇宜蘭的一个子弟戲、歌仔戲的世家，佇全省各地的 戲棚骹 大漢的。七歲的時，著頭一擺登台去表演，電視歌仔戲當咧時行的時陣，伊佇臺灣歌仔戲界chhèng較加四十冬。Ùi戲園仔、廣播、電視，到kah 國家劇院；ùi 民國五十五年第一部「精忠報國」，到民國八十二年上尾一部戲「洛神」，楊麗花攏總佇台視演出144檔戲，不但開啟了濟年來電視歌仔戲的輝煌生涯，嘛創造了電視歌仔戲佇所有觀眾心中永久的地位。一齣又一齣由著楊麗花做主腳（chú-kioh）、描寫忠孝節義的經典戲文，佇濟濟阿公、阿嬤的頭殼裡留落了永遠攏無法度放bōe記的印象。楊麗花伊所代表的歌仔戲曲調、歌仔戲文化，佇咧台灣即个工商業快速發展的所在，成做兩代儂人生路頂共同的記持。 楊麗花，生成端麗、大才（tāi-châi），好枝骨，面肉 幼秀 白抛抛，互伊來搬小生，真正有合。伊所扮演的角色，大多數攏是hit-lō 飄撇的緣投仔兄，清飄的阿舍哥，或者斯文的公子爺。伊的戲路，毋管是風流多情的唐伯虎、孽khia̍t 樂暢 的賈寶玉，飄撇的劍客，威風的大將軍，或者壓霸 嚴gâi的皇帝爺，淒慘落魄的和尚、乞食，伊攏有法度演kah徛真徛現，活跳跳，著nā 親像hit-lō飛天鑽地、飛簷走壁（hui-liâm cháu-phiah），有七十二般武藝的猴齊天，規身全本事，互觀眾佩服kah無話通講。楊大俠，伊千變萬化的戲路，嘛向hit當時的觀眾展出著歌仔戲 藝術的內涵kah活力。 民國七十二年，楊麗花佮戀愛已經成十年的諸夫朋友（cha-po· pêng-iú）——洪文棟結做連理，牽手行入愛的禮堂，享受平凡又佫安靜的家庭生活。洪文棟是楊麗花目睭裡的如意郎君、好翁婿，是一家之主；iah 楊麗花嘛一直是洪文棟心中 賢惠、善良的家后，伊全權負責厝裡囡仔序細的教育。
-
寶惜環境 寶惜地球 咱做夥來…
在線閩南語字辭典現查
版權
：歡迎加入《有緣來做夥》QQ陣（陣號：81229762）
