正音字例

每一種語言攏有一定的語法、語音標準，超出即个范圍者，著是「無標準」。唸毋著音、呼毋著調，這號做「choa̍h音」。咱儂的語言，是自然語言，會變會轉，這是無毋著。雖罔是安呢，語言佇某一个時代又佫是相對固定不變的，著是因為安呢，chiah形成一定的規範佮標準。簡單講，規範、標準，可比一條索仔，共語言本身，hām佮使用語言的所有社會儂，束縛tiâu咧。所以，嘛chiah有「正音」佮「choa̍h音」即兩个相對的概念。 正音、choa̍h音，當然只不過是相對的概念nā-niā。現子時是正音，無的確佇往過幾百年前soah kan-ta互儂當做choa̍h音niā；反倒轉，即mái咱講是choa̍h音，iah毋佫佇幾百年前hoān-sè是正音。瞭解即个道理，來講sòa落去，嘛chiah有意義。 閩南語，普略仔來講，會當分做三大音系——漳音、泉音、廈音。每一个音系又佫湠叉（thòaⁿ-chhe）做濟濟種無共的腔口。像咱定定咧講某物儂是漳浦腔，某物儂是同安腔，某物儂是晉江腔、南安腔、惠安腔、龍海腔、雲霄腔、安溪腔、廈門腔、鹿港腔、宜蘭腔……hâm-pa-lāng所有chiah-ê腔，濫摻來組成閩南語（漳泉語）語言系統。若是有佮即个系統無相匹配的，咱講he著算是無正。 有一寡情況是，個別儂唸無正，是個性的問題，帶有偶發的性質。另外有一款較嚴重的，比論講有某一个所在，某一个韻部，全部攏chiâu唸tâⁿ誤。即款情形，往往來講是有一暫ā，毋是最近chiah起變的niā。這比論講，佇漳州龍文區、薌城區hit tah（屬龍溪腔），前、後鼻音唸對調；泉州石獅市（屬晉江腔）半鼻音（鼻化韻）拍無去；閩台濟濟少年家/g/子音（聲母）拍交落（phah-ka-la̍uh）……像即款規phâng規片唸無正的，因為年久月深，taⁿ有的已經定型成做新的腔口。所以，這真正過頭繁複，毋是三兩句話講會當清楚。咱今仔日，上主要beh來探討頭一種情形——帶有非共性、偶發性、習慣性的choa̍h音。咱sòa落去，beh直接用例字的形式來講解。總講一句，我是起一个頭niā，朋友nā有beh補充，ia̍h者是有任何的意見佮建議，歡迎做伙來探討，有話盡講，毋免客氣，嘛免歹勢。Thank you.

標籤：正字, 正音, 稽考