葫蘆問（葫蘆運）
【源頭】「葫蘆問」，是一款帶有博弈（phok-e̍k）性質的遊戲，聽咧講伊的起源佇福建泉州。自早時一直到kah民國五六十年代，佇泉州、同安在地猶佫真時行chhit-thô即款遊戲。在咱瞭解，佇潮州汕頭hit tah嘛真時行。台灣hit爿，到kah現子時猶佫不止仔時行，三不五時佫有看著儂佇咧sńg即號遊戲。聽網友佇咧講啊，現子時佇台灣鹿港、台南、宜蘭 chiah-ê所在，計看會著即款遊戲。 「葫蘆問」，唸做“hô·-lô·-būn”。台灣鹿港、福建同安，計是安呢唸的；廈門儂講是「葫蘆運」，唸“hô·-hô·-ūn”。台日大辭典寫做「葫蘆分」，唸“hô·-lô·-pun”，毋知是腔口有差抑是啥物因由。潮州汕頭hia，有儂講“hôu-lôu-pūng”。 【概念】「葫蘆問」，早時是囡仔咧chhit-thô的，會得用咧poa̍h- kiáu、輸贏的遊戲，親像即mái咧sńg的「大富翁」著有影卜共卜共。Ah嘛有儂講「葫蘆問」著是「大富翁」的元祖。佮「大富翁」共款，「葫蘆問」嘛會使講是棋盤式的遊戲。「葫蘆問」即款遊戲，主要是由兩種家俬頭仔組成，一項是骰仔（tâu-á），規定兩粒，無加也無少；佫另外一項著是紙圖。紙圖是上kài要緊的物件。骰仔，通儂知，咱著免佫講。Nā紙圖，he chiah是真正有秘訣的物件。來講即張紙圖內底的佈置，伊頂頭畫的chiah-ê尪仔標，雖然是一仙一仙安呢照排落去，不而過，詳細共看，事實伊是按卷螺形安呢佇咧踅框（se̍h-khong）。目睭較金的儂，一下著看出伊攏總有踅三環，按照反時針的方向拍箍踅環，對外環安呢直直框入去，一直到kah內環上中心hit仙大大仙的神明為止。即內底計共有四十七仙尪仔標，除去上中央hit仙壽星無算的，攏總猶有四十六个尪仔標。即四十六个尪仔標，事實是二十三個體來組成，每一个個體攏出現兩擺（只不過前後的pose略仔有差），安呢雙雙對對，攏總二十三對。Chiah-ê尪仔圖，透底是中國民間傳說所牽涉著的一寡吉利的神或者是吉祥物仔，有神明、神獸、神物，嘛有仙花、仙草……濟濟項。
閩南喝拳[hoah-kûn]
佇網頂chhiau著一寡有滋養的，hiù出來互咱逐个罔鼻芳。 儂講「君子無贏頭拳」，闽南拳，講究「拳不離母」（出拳一定愛出「大頭拇」），有的所在無喝「五」。閩南在地儂喝拳攏全閩南拳，佇chia汝nā卜佮儂“哥倆好”（ko-liâ-hâu），he是無儂卜佮汝“好”（hâu）。外江儂喝拳駛普通（普通話），講hit號：一点点、俩相好、三星照、四季财、五魁首、六六顺、七个巧、八匹马、酒（九）你喝、 全福寿。 廈門儂實在有影真古錐，喝拳嘛攏全齣頭了了。斟酌看māi，汝著知—— 「廈門路名拳」：一條龍、二舍廟、三條巷、四仙街、梧（佮「五」同音）桐埕、六仙公、七市場、八卦埕、九竹巷、十字路、不見天（對手拳）。 「三國拳」：單刀赴會、二嫂過 溪、三戰呂佈、四門總開、五關斬將、六出祁山、七擒孟獲、八卦陣圖、九進中原、舌（十）戰群儒 （「舌：sia̍t」佮「十：si̍p」照講是無共音） 「中草藥拳」：一見喜、兩面針、三君子、四物湯、 五加皮、六神丸、七星散、八卦丹、九宮散、十全大補
闽南民间风俗—出世、剃頭、满月、四月日、度晬、十六岁、做生日
俗語 講「一鄉 一俗」，閩南 所在 的 生活 風俗 實在 足有 地方 特色，風俗 習慣 有夠 濟，一年 三百六十五工，差不多 逐工 攏無 共款，毋是 過年，著是 過節；供（kèng）神 拜佛、做生日、好歹事……濟kah互儂算bē離、唸bē完。民間 風俗 是 鄉土 文化 當中 真 重要的 一个 部分，往往 hām 鄉土 語言、鄉土 藝術、民間 曲藝、宗教 信仰 相粘蒂帶。Chiah-ê 傳統 的 民間 文化、風俗 習慣 是咱 老祖先 佇咧 古早 農業 的 時代，所來 産生 的 社會 文明，是 咱 寶貴 [...]
河洛？抑是福佬？
今仔早起，佇MSN頂頭拄著一位先生。初見面，心適心適，佮伊開講起來。Beh講，進前應該是對方先招我chhām伊連線做「線友」的。當然，有儂主動beh佮咱做朋友，咱定著愛真心去交陪。所以，早起見面登陸 niā，我著隨主動「趖過去」佮伊相借問。就安呢，沓沓仔(ta̍uh-ta̍uh-á)講(káng)起來。一開始，我著隨感覺對方若像是台灣儂；一下問，對對有影。安呢，我歸氣choăⁿ-á chhām伊講咱儂話，一直到kah落線bye-bye… 即位台灣的朋友SLS（歹勢講出伊的名號，先用羅馬字母做代號），一見面就問我「河洛」（Holo）即詞福建漳泉所在敢有儂安呢講。我應講「無」，了後，伊佫問我中國的Hakka（客家儂 / 客儂）安怎稱呼福建漳泉儂？聽伊安呢問，我家己著咧ioh講，伊穩當是想beh問我有關「河洛」、「福佬」的代誌……
中秋博狀元，廈門例俗
博餅（poa̍h-piáⁿ），嘛叫做「博狀元」、「博中秋」，是咱廈門儂慶祝中秋節的一種傳統的活動，一種特殊的月餅文化。民間方誌記載，廈門儂博饼，到taⁿ上少有三四百年的歷史。現子時，博餅活動已經成做閩南在地文化當中十足重要的一項，會使講是閩南民俗的一个標誌。 廈門民間的博餅，有伊的歷史故典。民間傳說講，往早，鄭成功佇福建起兵，廈門做根據地，做兵仔儂透底攏是泉州府、漳州府、潮州府即三个所在的散兇儂。俗語講，「中秋無轉厝無祖，年兜無轉厝無bó·」，做兵仔儂，出外口久長長，思想故鄉的親儂未免得。尤其若到kah八月半，想厝的心情較佫是無法度平靜落來。為著安搭、排解士兵鬱chut、稀微的情緒，鼓舞軍隊的鬥志，鄭成功佮伊的軍師、部將著想出一套會當消譴娛樂的遊戲，互in的將士做夥來chhit-thô消譴。經過一代傳過一代，即套遊戲嘛按hiàng時直直流傳到taⁿ，成做今仔日廈門、同安、金門所在kái有特色的風俗。 今仔日，咱beh將廈門博餅活動的規則，來做一个詳細的介紹。 【會餅】 博餅博餅，著是用「餅」來咧博，來咧輸贏。看啥儂贏的餅較大塊(tè)，啥儂贏較濟。用咧輸贏的餅，有一个專名，叫做「會餅」。傳統的會餅，每一會，固定是63塊，有大有細；每一款月餅，攏代表一个名號，分別是：狀元餅1塊，對堂餅2塊，三紅餅4塊，四進餅8塊（是進士哦~），二舉16塊（是舉人neh~），一秀餅32塊（秀才啦）。當中，狀元餅上大塊，上有價值；一秀上細，數額上濟。 【遊戲儂數】 無固定儂數啦，建議每一會上好mài超過10个儂；當然儂傷少嘛無趣味。 【準備khang-khè】 1、攢(chhoân)家俬頭仔：一塊桌頂（輔助工具）、一會會餅、一副骰仔(tâu-á，六粒)、一塊大碗礓（硘的，愈弧（ô·）愈好）。 2、桌頂排滯廳中央，碗礓khē坫桌頂。眾儂圍倚(oá)來，準備博餅。 【遊戲規矩】 博餅有一套規矩（無共的社里，小可有精差），儂儂攏愛遵守。講起來誠簡單，講破毋值錢。代先，是在為咱逐个設計的一條「鬥句話」： 博餅著準備，代先唱（chhiàng）規矩。 眾儂聽分明，事後莫（bo̍h）交纏。 逐家圍桌墘，某儂先開始。 手la̍k骰仔jí，鏘喨tàn落去。 碗底現數字，賞罰有根據。 博著啥物點，著賞伊啥物； 骰若跳出礓，罰伊停一期。 博好換隔壁，直直輪落去。 等到月餅盡，遊戲嘛停止。 唸煞即條鬥句話，相信各儂心肝內應該攏有一个粗淺的概念。紲落來，詳細的規矩，說明如下（對照圖畫看說明）： 1、 一秀：出一粒紅四，得一塊一秀餅（圖1）。 2、二舉：出二粒紅四，得一塊二舉餅（圖2）。 3、四進：出四粒點數共款的（四粒紅四無算在內），比論講，四粒一、四粒二、四粒三、四粒五、四粒六，像圖3。 4、三紅：出三粒紅四，得三紅（圖4）。 5、對堂：點數自一排到六，號做對堂（圖5）。 6、 狀元：狀元餅的輸贏（華語：角逐）上kài 趣味。「狀元」分做幾偌个坎（等級），有「大狀元」佮「小狀元」的分別。不而過，狀元餅kan-ta一塊，所以，逐家著愛來拚輸贏，看啥儂博的級聲較懸（koâiⁿ）。輸贏的規矩，會使講是「大魚食細魚，細魚食蝦米」、「賊劫賊，鎖管仔劫墨賊」，總是，到尾仔，真正的「狀元」kan-ta一个niā，第一猛的摕(the̍h)去食。大細狀元的級聲，按照自細到大的順序，規定如下： （1）出「四紅」，也著是四粒紅四的情形（像圖6，毋佫，無包括「四粒紅四，帶兩粒幺」），著會使算是狀元。假使有兩个儂（或者是較加兩个儂）攏出四紅，安呢，愛佫比看啥儂帶的點數較大，大的贏。其中，「四紅帶十二」上大。 （2）、比「四紅」較大的，是出五粒點數相siâng的（圖7），號做「五子登科」（簡稱「五子」）。當中，「五粒六」第一大；「五粒一」第一細。 （3）、比「五子」較大的，是六粒點數完全共款的情形（圖9）。 （4）、比五子較大的狀元，是四粒四帶兩粒一（圖8），這號做「狀元插金花」。按規矩，博著「狀元插金花」的儂，除了得狀元，佫會當搶走兩tè「對堂」。。 （5）、特殊情況—— ①、出現「六粒紅四」（圖10），號做「六杯紅」（lio̍k-poe-âng），是全局上kài 大的狀元公。按規矩，博著「六杯紅」的儂，所有的會餅攏總伊的，總ba̍uh。總是，現代儂感覺即條規定毋是真合理，所以有時會臨時取消即項規定。 ②、出現「六粒六」（圖11），號做「六pū烏」（lio̍k-pū-o·），是「歹吉兆」。按古早例，nā出「六pū烏」，各儂著緊關門禁燈，眾生相爭來搶餅，烏白搶，由在儂搶。搶贏儂的，搶無是恁兜的代誌。不而過，即項古例，即擺較無咧時行囉，因為安呢實在誠無文明，所以，即條會使講tih-beh互儂sài去囉。 7、添注說明： （1）、狀元餅kan-ta一个。橫直，啥儂是上kài 大的狀元，啥儂得去。 （2）、只beh遊戲猶未煞局，著准講某一項會餅已經暫時互儂分了，按規矩，猶原會當佫chip倒轉來，意思著是講後壁poa̍h著點數較懸的，照原會當kā頭前點數較kē的儂「搶」餅，ah嘛有可能會佫再去互別儂「搶」走。這是遊戲當中上kài 刺激的、嘛是上kài有趣味的。只beh點數較懸儂，後來者著會當憑點數來「搶走」進前互儂摕去的月餅。比論講，三紅餅暫時分了，過後，若有儂佫博著三紅，而且伊所帶點數佫比進前的較懸，安呢，著會當「搶走」。一般來講，到「四進」即級的，猶有儂咧搶，iah若二舉、一秀就無儂搶囉。搶到底時煞咧？只卜遊戲無煞局，著會使直直搶落去，一手過一手。 （3）、傳統的博餅，博的是真真正正的餅。不而過，現在的社會，月餅實際無啥儂咧食囉，所以會餅透底攏已經換做實實在在的物件，比論講各式各款生活用品、家用電器、金銀器，甚至紅包、現錢……會餅雖然換做物件，不而過博餅的規矩無變。所以，博餅嘛變kah加真趣味，加真刺激。 PS：博餅做為廈門、金門、同安在地傳統的節日文化，早早著「社會化」囉，taⁿ成做全市各族百姓共同的節日文化；成做全市各行各業95%以上的企業佮公司的「企業文化」。現子時，博餅文化愈傳愈遠，傳去到漳州、泉州內地、龍岩、三明、福州……另外，根据瞭解，今年，廈門市已經向國家有關部門申報，按算卜共「博餅文化」摕去申請「國家級文化遺産」。 相關連結：2004年第二屆博餅文化節
-
寶惜環境 寶惜地球 咱做夥來…
在線閩南語字辭典現查
版權
：歡迎加入《有緣來做夥》QQ陣（陣號：81229762）
