衰潲伯仔

下底的笑詼古，是按網頂的資料改編的——

滯佇咱廈門灌口大菜市仔骹chia，有一个老阿伯，伊聽儂講，集美石鼓路hia，新開的Mcdonalds，物件誠芳誠好食。有一日，老阿伯早早著睡精神，按灌口騎撲撲車，拚來到集美，卜來等Mcdonalds開門食hàm-pau。真無簡單，等kah九點開門，老阿伯頭一个衝入去。

一个服務小姐過來問伊：「阿伯仔，汝卜食啥物咧？」
阿伯仔應講：「我…我卜挃一个有夠薟，佫有夠芳，佫有夠大粒的…hit-ê號做hàm-pau啦！」
服務小姐佫問：「汝卜『加蛋』毋」？
「加蛋」，阿伯仔聽做是福建話的“遮等”，就應講：「好啊好啊！遮等著遮等…」
服務小姐講：「『加蛋』著加十箍哦！」
阿伯仔chhoah一趒：「『遮等』著加十箍哦？若按呢，我外口等著好啊」……

早頓食飽後，阿伯仔又佫駛著家己的撲撲車，去集源路建設銀行辦代誌。阿伯仔來到銀行的門骹口，看著內底誠濟儂咧排隊，心內緊狂，安全帽也無剝（pak），口罩也無溜（liù），做伊sōng入去。

銀行的警衛，看著阿伯仔按呢生穿kah sông-sông，行過來kā閘tiâu：「老人家，你要辦什麼事嗎？」
阿伯仔講福建話：「我卜來辦存摺仔卡啦！」
警衛真有禮貌，嘛講福建話：「辦存摺仔，佇hit爿櫃台，毋佫，汝安全帽著先溜落來。」
阿伯仔乖乖仔將安全帽溜落來，警衛又佫講：「汝佫愛…褪…褪『口罩』啦……」
阿伯仔chhoah一趒：「啥貨啊？佫著愛『褪褲走』哦？！哪會安呢啦？Ah…ah著走幾環啦？」

真無簡單手續辦好勢，銀行櫃檯講著愛去外口的提款機hia改密碼。阿伯仔手摕存摺仔卡，行去到外口，對著提款機，將卡片sak入去。無張弛，雄雄聽著提款機soah佇咧講話：「請輸入密碼」
阿伯仔越頭四界bāi-bāi看看咧，看無儂倚來，趕緊用手掩（ng）咧喙箍的，細細聲對提款機講：「5438、5438啦！」

尾仔，好佳哉是銀行員工出來鬥相共，阿伯仔chiah共手續全部辦完成。騎撲撲車卜轉去厝的，佇半路又佫拄著警察咧臨檢，互儂閘去邊仔問。
警察：「汝，汝『行照』咧……」
阿伯仔聽hit-ê警察安呢講，當做講警察卜喝伊走，著趕緊褲骹襒咧，越頭做伊下命走。是講，嘛龜怪啊……無gî悟 hit-ê警察soah佇後壁拚命chip，彎過幾落條街，總算kā伊chang著。警察問伊：「Ah汝是咧走按怎啦？」
阿伯仔嘛感覺真冤枉真鬱屈，應講：「ah汝毋是叫我『先走』？！無我哪會走？！」

轉去到厝的，阿伯仔真bē爽，想著講一日有法通拄著hiah-ni̍h濟代誌，真正有夠衰，伊決定卜去社頭茶店仔hia，chhōe老兄弟啉燒酒解憂愁。 儂若咧bē快活，食酒重倍gâu酒醉。啉無偌濟niâ，阿伯仔著茫su-su，醉倒佇路邊。
有好心的過路儂叫救護車，送伊去醫舘。護士小姐叫伊bē精神，佇伊的lak袋內chhōe一張破糊糊的身份證，因為傷過破，頂頭的字攏變kah霧霧，看bē分明，kan-na看著一字「林」字，叫啥物名，毋知影。
為著卜登記滯院手續，護士小姐看破kā阿伯仔掠起來搖佮chhe̍k，問伊講：「阿伯，阿伯，汝是林啥貨啦？」
阿伯仔頭殼眩眩，應講：「啉啥貨，ah to啉高梁啦！」
護士小姐：「毋是啦，我是問汝叫啥貨啦……」
阿伯仔：「哪有叫啥貨，ah to叫兩个小姐坐檯niâ……」

因為酒食過量，醫舘的先生交代阿伯仔，轉去厝的，著愛照時陣食藥仔。阿伯仔卜出院進前，護士小姐合（kap）一袋藥仔互伊，先用普通話交代講：「藥效四小時……」護士佫驚阿伯仔聽無，挑工佫用福建話講一擺：「阿伯仔，聽有無？食飽三粒哦！」阿伯tìm頭，自按呢倒轉去厝的。

阿伯仔轉來到厝的，想著護士交代的話，家己一儂坐滯門口戶橂頭（hō·-tēng-thâu）hia……過兩三點鐘後，in新婦感覺無啥著，走去門口一下看，看著in大倌（ta-koaⁿ）坐佇hia，「哈、哈、哈、哈」直透笑，笑無離（lī）。新妇趕緊問伊是安呢是咧創啥？ 阿伯仔真受氣，喝講：「mài吵啦，儂護士交代講，『要笑四小時』，我chiah『笑』三點鐘niâ neh……」

好得是新婦解說互伊聽，阿伯仔chiah知影是家己誤會啊。雄雄，又佫想著護士另外有交代「轉去著愛『多喝水』」 ，就趕緊peh去咧眠床頂，倒kah平平，骹手攏毋敢振動。
媳婦問伊：「阿爸，ah汝毋食藥仔，soah倒佇眠床，是咧創啥貨啦？」
阿伯仔應講：「soah毋知hit-ê護士叫我轉來愛『倒好勢』啊！」
新婦又佫再三解說，阿伯仔chiah知講儂是卜交代伊「多喝水」。話講清楚了後，新婦做伊出去做代誌，阿伯仔家己一儂佇厝的食藥仔。Siáng知影講，藥仔食無三字久，阿伯仔又佫互救護車送轉去醫舘。

即擺，阿伯仔一條老命真正險險仔報銷去。經過急救洗胃通腸，佳哉好八字，猶有救，死無去。阿伯仔愈想愈慼心（chheh-sim）：「啥物咧我食毋著藥仔，明明是hit-ê護士交代我講『藥仔，食百三粒』！我哪有聽毋著啦……」

哭夭啊，儂護士本成是卜交代「食飽後，食三粒藥仔」，阿伯仔soah聽做是「食百三粒藥仔」。可憐代……

標籤：講笑詼

三聚氰氨（三支筅仔）

進前看電視，聽著“三支筅仔”的講法，taⁿ寫一條笑詼的，佮逐个同齊來分享。

2007年，中國一間生產牛奶粉的大公司——三鹿集團，因為in生產的牛奶粉無合格，真濟紅嬰仔佮老大儂食了後，攏bē放尿，sòa落去腹肚內佫會結石頭仔。經過化驗，發現講這三鹿牌的牛奶粉，內底計有摻一款號做“三聚氰氨”的化學元素。因為製造有毒的牛奶粉，害死bē少儂，三鹿集團受國家整頓，無偌久了後，自安呢倒店去。有一个老阿婆知影即層消息了後，有一日伊出門去買牛奶粉，伊來到一間專門咧賣食品佮生活用品的超市。

阿婆：徛店小姐，恁遮有咧買牛奶粉無？
徛店mm：牛奶粉有啦，汝卜買叨一款的？
阿婆：我卜買……Hit-lō…食著較bō燥(sò)的…ah頂頭有畫一个鳥仔岫hit款的啦……（阿婆仔無讀冊，毋捌字，佫bē曉講普通話，卜買啥物牛奶粉，連伊家己嘛講bē清楚。）
徛店mm：啊，我知啊！阿婆汝是講卜買“雀巢”的，著無？（“雀巢”即兩字，小姐是用普通話唸的）
阿婆：啥物咧“青草仔”……我聽汝咧腫頷！（“雀巢”普通話讀音kiau“青草”的閩南話讀音卜共卜共）
徛店mm：無啦，阿婆，我是講“雀巢”、“雀巢”啦……（小姐佫講兩遍“雀巢”）
阿婆：ah..好啊！汝咧講規晡，我哪知影汝咧講啥？！……汝..汝去摕來我看māi咧啦。
小姐聽阿婆安呢講，就入去內底摕一包“雀巢”的牛奶粉出來。
阿婆佫問：有“三支筅仔”無？
小姐應講：三支筅仔？！……哦，我來看māi……
小姐聽了，感覺誠奇怪，想講阿婆是卜買筅仔，就入去內底攑三支咧鑢廁所的塑膠筅仔出來。
小姐：阿婆，汝卜挃筅仔是毋？筅仔佇遮，攏總三支，著無？
阿婆：著…著汝去死啦！我是問汝這牛奶粉有摻“三支筅仔”無？ah汝soah共我搬這三支廁所鑢仔出來，是卜創啥死儂骨頭啦……
小姐chiah知影講原來阿婆仔是咧問看牛奶粉內底有摻“三聚氰氨”無。

標籤：講笑詼