Posts by admin:
《南溪港》
曲調: 套用「南拳媽媽」所唱的普通話歌《牡丹江》
添詞(有參考《牡丹江》原作詞)：limkianhui
Keng choè chi̍t keng ê kiô-keng, tò-chiò tī-leh ô· bīn-téng
弓做一弓的橋弓①，倒照佇咧湖面頂
Lí tùi hit pêng khoàⁿ chit pêng, thiⁿ-téng ê goe̍h îⁿ-lìn-lìn
汝對彼爿看即爿，天頂的月圓輦輦②
Chheⁿ-chio̍h-pang kū-ke-á chêng, lí goá kiâⁿ-koè ê chêng-kéng
青石枋③舊街仔前，汝我行過的情景
Hit choā phoà-noā ê liâng-têng, chit-chūn tàu-tè siáⁿ-mi̍h hêng
彼逝④破爛的涼亭，即陣到底啥物形
Kiâⁿ bē-kàu- -ê lóng kiò-choè Pak-téng, siūⁿ beh tńg ê só·-chāi kiò bāng-kéng
行bē到的攏叫做北頂⑤，想卜轉的所在叫夢境
U……
嗚～～～ 繼續閱讀 »
外洋漁工的故事（1～10）
編譯：limkianhui 頭序 本文是照作者真實的經歷來寫的紀實小說（siáu-soat），是一个關係海上血汗工場的故事。為著保全個人私奇（su-khia/sai-khia），船員有用假名，ah若故事內中所講的——hiah-ê船頂的代誌，攏總是正實（chiaⁿ-si̍t）的；船務代理公司佮漁業公司有的嘛用假名。 本文徛算「內在較贏過文字」，kan-kan-á愛卜看「YY型小說」的儂，拍算勿愛看較勿會gīn。 …… 2010年3月31號暗。佇大大間的冷藏倉（léng-chông-chhng）ni̍h，林達拚kah大氣喘勿會離。一四界攏chiâu凍櫃鎮滇滇（tīⁿ-tīⁿ），空氣勿會啥tháu，儂咧行的巷路狹覕覕（e̍h-bih-bih），拄好兩个儂thèng好相閃身niā，所在的確真熻（hip）真偓促（ak-chak）。林達雖然一直透舞無停，拚kah滿身重汗，ah毋過，骹底soah猶原凍吱吱。著按呢，汗ná流，ná咧搬魷魚仔凍，大大件，一件soà一件。溫度下（kē）到tih-beh倚零度啊，驚了小可歇停（hioh-thêng）一下，khiám-chhái著愛凍死滯即个毋是儂滯的所在。當（taⁿ）已經相連soà操卜二十六點鐘啊，邊仔hiah-ê漁工，敢（káⁿ）是操傷久，儂咧悿（thiám），接載勿會牢（tiâu）啊，攏瘟滯凍櫃仔邊咧tuh龜。林達毋敢，伊驚了一下歇，身軀若冷落來，汗水食入腹，khiám-chhái會染著風寒，破病感冒。
兄弟，想較開！
◎limkianhui 寫一張批，卜寄互汝 兄弟啊，汝著看破、死心、想較開 雖然是短短無幾字 也毋是啥物大道理 …… …… …… 聽汝講近來的代誌 兄弟我，替汝毋值、為汝心掛意 既然勿會共（kāng）心 放伊去 免著疼 毋免咧傷悲 …… …… …… 嗚～嗚～嗚…… …… 感情 雙方面的代誌 有緣做堆 無緣煞煞去 青苔（chheⁿ-thî）離水 難免會焦（ta）去 這是千古不變 自然而然的道理 …… …… …… 犀牛望月 月仔缺 火燒罟（ko·）寮 賰怯（khiap）鐵 世間人情義理 無底的深坑 人生愛恨恩怨 無比止 查埔囝 著愛展出查埔囝的勇氣 向前行 目屎撥（poeh）一邊 三年五年 十年二十年 西裝領帶 皮鞋目鏡 拚出頭頂一片天 …… …… …… 兄弟，想較開！
廈門市普通公交，報站卜加報閩南語
廈門普通公交的，試用三種語言報站。 有消息講，廈門市普通公交車，卜開始試用普通話、英語、閩南語三種語言來報站。當（taⁿ）是先滯「廈60路」公車線做試點。 廈門公交集團的工作人員介紹講，目前三語報站猶佫咧試，猶未覆冚（hok-khàm）到全市所有的公交車ni̍h。 報站的內容，具體是：到站報，起行報，下站預報。 「廈60號」公交車，即過先試用三語報站，聽講是濟儂o-ló，少儂嫌，贊聲的儂不止濟。
母語≠族語＆族語的運途
族語kiau母語，照講是兩个無共款的概念chiah著。母語，我拍算彼（he）是咱儂自細漢著學講的語言，母語kiám-chhái有幾若號語言，嘛 kiám-chhái kan-na一號niā。Ah若「族語」，通講是汝本底種族的語言，著是咱土話所講的「父母話」。有的民族，內部毋但若（m̄-tān-nā）一號語言 niā，比論講「漢族」｛究真漢族是毋是一个民族，猶佫有通理論一氣（lí-lūn- -chi̍t-khùi），暫且kā伊當做是一个民族｝，有普通話、廣州話、客話、閩南話、福州話、上海話、東北話……濟濟號，論真講，chiah-ê計計是漢族的族語敢毋是？總是，無幾个有法度攏總捌。 掠我本儂做例來講，公家法定的戶口冊頂頭，登記講我是漢族。好，漢族著漢族，我無意見。在我拍算，若是佇較早，有儂卜問我，「ah汝的族語是啥？汝的母語又佫是啥？」是普通話毋？臨當時（liâm-tong-sî）叫我應，我kiám-chhái應bē出來，愛佫想liâm-mi-á，chiah有法度開喙應伊。 共款的問題，若是去問阮老母（無讀冊，毋捌字），汝算伊會怎樣應汝？喺（hēⁿ）啦，kiám-chhái伊嘛無法度kā汝應，彼是因為伊毋知影「族語、母語是啥物碗糕」，卜解說（ké-soeh）kah互伊聽有，敢（káⁿ）有較僫啦。不而過，這我會當替伊講，伊的族語是「閩南話」，無毋著，著是「閩南話」。 按呢講起來，母語kiau族語的概念，有影會去相濫著。汝像阮母仔，伊kan-na會曉講一號話，自細漢到即mái食老，kan-na講閩南話。所以，伊的母語kiau族語相共。 若我咧，普通話我是會hiáng講 無毋著，總是 彼我大漢讀冊了後chiah學的。所以，我的母語，嘛kan-na閩南話niā。佮阮母仔相親像，我的母語kiau族語相共。 阮查某囝，著毋是按呢囉。從（chêng）出世，厝ni̍h的大儂著教伊講普通話，ah若閩南話，是加少教一半句仔niā。卜問伊的母語是啥？普通話定著算在額（gia̍h），這是免佫講。Ah閩南話咧？事實，聽，chiàng時伊大半是會曉聽，不而過若卜叫伊講，伊有影講bē翻。雖然有時仔會綴儂講一半句仔，總是，講講講又佫變做普通話去囉。按呢，閩南話liám-liám-á會使講是伊的母語。 阮舅仔（kū-á）in後生，也著是阮某in孫仔（sun-á），比阮查某囝猶佫較細漢，今年當仔（taⁿ-á）兩歲外niā。講起來，伊佫較「慘」，自出世到當（taⁿ）攏無儂教伊講閩南話，kan-na教普通話niā。所致，伊全全bē曉閩南話，儂若咧講閩南話，伊攏鴨仔聽雷。卜問伊的母語是啥？敢會是閩南話？汝hoān-sè會隨應講「斷斷（toàn-toàn）毋是！」著無？Ah伊的「族語」咧？敢通講伊的族語是「伊bē曉講，嘛bē曉聽的閩南話」？是抑毋是？我講，的確是！ 我卜講的，「母語」毋是「族語」，魚還（hoân）魚，蝦還蝦。 佇遮，我卜用幾个數學符號，來概括我今仔日卜講的主題——族語的運途。 1、母語≌族語。有即號情形的所在，in的族語，猶佫活跳跳！若是社區內所有的儂攏即款情形，按呢即个社區，若毋是傷保守（像古早時陣大清國），無著是傷現代化（大概像即陣的英國，美國的白儂社區）。 2、母語≥族語。若是這，表面上是有兩款情形通講，後果soah攏相共。一是，社區真活潑，初初看起來，社區內的語言kán-ná有較多元（像即陣的番爿馬來亞）。總是，佫愛看叨一號語言較佔贏面，叨一號語言較輸面。若是族語較贏面，按呢伊會愈來勇健（ióng-kiāⁿ）！Ah若無，緊縒緩（kín-choa̍h-oān）嘛是愛插去燒！美國儂的英語，新加坡福建儂的福建話，一白一烏，拄好通掠來做干證（kan-chèng）。 佫另外一號情況是講，社區內 在地儂的族語強卜「過身」去啊，卜死teh bē斷氣啊，teh拖屎連啊，liâm-mi著卜無去（bô- -khì）啊，卜掆去埋（kng-khì-tâi）啊。像即陣廈門島內的閩南話，著是按呢。 3、母語Ø族語。這是母語kiau族語完全無交插（kau-chhap），族人bē曉講家己的族語啊。像台灣的平埔族，像中國的滿族。
鼓浪嶼之夜
Ge̍h-mî sió-tó chhin-chhiūⁿ chi̍t chiah chûn 月暝，小島親像一隻船， tòe hái-éng teh ek ah ek 綴海湧咧溢啊溢…… Sim-ài- -ê lí iā tī góa 心愛的，汝也佇我 ê sim-hái- -ni̍h chhe̍k ah chhe̍k 的心海裡，趞啊趞……
母語毋是閩南語的儂在廈門的語言環境調查問卷
近來，廈門大學中文系，有學生佇網頂做一份調查問卷，卜調查「母語毋是閩南語的儂佇廈門的語言環境」，用按呢來研究在佇廈門的外江儂in的語言狀況，看閩南語是毋是對外江儂有所輻射，進一步來瞭解廈門地區社會語言的使用狀況。即份調查，攏總收著41份有效問卷。 調查問卷的結果（鏈接）：http://www.sojump.com/viewstat/303500.aspx。
叫我一聲
汝毋免想我，想我勿會（bōe）快活 汝總是向望月娘圓，月圓將汝引取（chhōa） 既然決心入兵營，請汝暫時都（to·）毋免心掛 請汝暫時都毋免心掛 汝啊汝啊，著愛食互飽 汝啊汝啊，毋通受風寒 這（che）是阮做婦人儂（hū-jîn-lâng）啊～啊哈～卜交代的心聲 這是阮做婦人儂啊～啊哈～卜交代的心聲 汝勿愛（mài）嚇（heh）驚我 講甲一大拖 勿愛叫是唱煞了衛國歌 隨時著卜去拼命 既然送汝去前線 相信一切我已經看破 相信一切我已經看破 我也…我也…也勿會感覺心驚 我也…我也…也勿會感覺心驚 上帝爺伊也勿會招汝～啊哈招汝做附馬 上帝爺伊也勿會招汝～啊哈招汝做附馬 花蔫（lian）花又開，月斜月又正 汝準做去到天邊 嘛想咱兜門口埕（tiâⁿ） 既然決心做軍眷（koàn），必定隨時送汝起行（kiâⁿ） 必定隨時送汝起行 汝去啦 汝去啦 汝去啦 汝去啦 汝去啦 汝去啦 我只要汝佫輕輕叫我 啊哈～叫我一聲 我只要汝佫輕輕叫我 啊哈～叫我一聲 ps. 按中國普通話民歌《吻我一下》（原唱儂：龔玥）所來改編。卜看歌譜，請拔駕過來去「Flickr像冊」。若卜聽原曲（普通話），按chia行。
「閩南話」往過叫啥物名
往早，佇咱中國福建省內部，福州儂、閩北儂稱呼咱的話是「下南腔」。福建舊早儂講「八閩」，著是有八个府，分別是：頂四府「建、延、邵、汀」；下四府「福、興、漳、泉」。下四府，又佫分做「頂勢府」佮「下勢府」。所講的「下勢府」著是「漳、泉」兩府。頂勢府的儂，叫下勢府漳泉即角勢的儂號做「下南儂」，所以chiah有「下南腔」的講法。「下南腔」是佇福建省內部講的，出省了後，著無儂按呢講囉（台灣當時算福建管的，佫台灣的唐儂大半是漳泉過去的，所以英國儂余饒理佇台灣出版的《三字經新撰白話註解》嘛將台灣儂所講的漳泉話講做「下南腔」）。 來講，佇咱漳、泉兩府內部，包括同安、廈門，講話相通，講的是共一號話，總是腔口無攏相siâng。中國儂攏知影講，中國的話真濟，一省一號話，互相無通話。橫直，若是講勿會通的，咱儂攏共儂講做是「外江話」、「外省話」、「北頂話」chiah-ê有的無的。相對著「外江話」、「外省話」、「北頂話」來講，咱漳泉的百姓，叫家己的話是「咱儂話」、「咱厝話」、「咱tè（tèr）話」、有時仔嘛會講「咱下南話」。「咱tè（tèr）話」意思是「咱即tè的話；咱即个所在的話」。這攏是咱漳泉儂家己內部咧叫的名，出外口，拄著別所在的儂，著無咧佫用即款名號。 中國各所在，攏有家己的「本地話」（在地話）。本地儂往往講家己的話是咱「土話」、咱「本地話」。這是就「官話」的角度來講的。閩南儂嘛是共款有按呢講。Ah若「白話」，是相對「漢文（文言）」的角度來講的。比論講，父母定定共囡仔講「出門佮儂講普通話，轉來到厝裡，對父母序細、鄉親序大，換講白話著好啊啦」。白話字，意思著是「用咱家己鄉里的白話寫出來的字」；白話文，嘛是共款的意思。廣州話當（taⁿ）互外口的儂叫做「白話」，論真講，彼自底嘛不過是廣州儂家己咧講，路尾詞義擴大所起致。 漳泉儂出外口、過番的、行洋的，自來真早，真濟。往過，咱儂出去外口，若是對別儂講起著咱的話，較濟是叫做「福建話」（彼陣猶未有儂講「閩南話」即个名號）。別儂聽咱講話，嘛順趁咱的喙，叫咱「福建話」。
電影《葉問2》閩南語字幕
香港電影導演葉偉信主導的動作片《葉問（2）》，2010年4月底開始公演。到當（taⁿ）已經teh-beh兩月日久，中間，拍算濟濟儂有去電影院看即齣電影。總是，必定嘛有濟濟儂因為各種因端，猶未去看，有的kiám-chhái無閒，kiám-chhái無聽儂講，嘛kiám-chhái嫌貴、bōe出得看。當（taⁿ）不管按怎樣，佇網頂有法通看囉！網址報咱知：http://eedyy.com/video/?js14142.html。 著啦，卜佇網頂看即齣電影，拍算汝電腦著愛先安「Qvod（快播）」即號軟體。電影檔案的格式是.rmvb，互伊在線放煞了後，會佇咱電腦系統「Media」即个文件夾仔內底自動複一份出來！ 咱會當共即份檔案收起來囥，按呢，另日若是想卜佫看，也著毋免佫上網去看囉。即个時陣，咱若是有興趣，會當來去揣字幕來配搭（即齣電影自底無合（kah）字幕啦）。我前幾日，有做一份閩南語的字幕，掛佇「射手網」，卜挃的儂，會當掠轉去用。總是，即个閩南語的字幕，算做是外掛的字幕，檔案的格式是.srt。
-
寶惜環境 寶惜地球 咱做夥來…
在線閩南語字辭典現查
版權
：歡迎加入《有緣來做夥》QQ陣（陣號：81229762）
